Киин куоракка хаар уутун оботторуу үлэтэ күүһүрэр

Дьокуускай коммунальнай хаһаайыстыбатын үлэһиттэригэр түбүктэрэ элбээн турар. Күннэтэ ууну кытта охсуһуу үлэтэ быыстала суох төгүрүк суукка устата тэриллэр. Ууну хачайдааһын бастатан туран, намтал сирдээх уулуссаларга күүскэ ыытыллар.

Юрий Спиридонов, "Жилкомсервис" тэрилтэ дириэктэрэ: "Биһиэхэ оннук 200 тахса сир баар. Биһиги болҕомтону уурабыт киин уулуссаларга, ону тэҥэ дьон хаамар сирдэригэр. Оттон куорат кытыы уулуссаларын эмиэ хаһан да умнубаппыт, наар хачайдыыбыт".

Куорат киинигэр, кырдьык да, сир биллэ кууран эрэр. Ордук Өрөспүүбүлүкэ болуоссатын диэки ырааһырбыт. Ону олохтоохтор эмиэ бэлиэтииллэр. Ол эрэн киин да эҥэр сорох сирдэринэн инчэҕэй дииллэр.

"Куорат киинэ онон-манан курааанах буоллаҕына кытыы оройуоннарга балаһыанньа чыҥха атын. Бестужев-Марлинскай уулуссаҕа массыына көлүөһэтин бүрүйэр дириҥнээх уу".

Оттон ол да буоллар куорат кытыы эҥээригэр ууну хачайдааһын үлэтэ эмиэ ыытыллар. Дьокуускай куорат хаһаайыстыбатын үлэлэтэр сулууспа этэринэн, күн ахсын сүүһүнэн кууб ууну хачайдыыллар. Бу кэмҥэ куорат уулуссаларыттан уопсайа  3 тыһыынча кууб уу хачайданна.

Ууну тэҥэ хаары хомуйуу үлэтэ эмиэ ыытыллар. "Якутдорстрой" тэрилтэ кыһын устата 534 тыһыынчаттан тахса кубометр хаары туһааннаах мунньар сиргэ тиэйдэ.

Александр Павлов, «Якутдорстрой» тэрилтэ дириэктэрин пресс киинин үлэһитэ: "Бэйэбит тэрилтэбит тиэхиньикэтинэн 274 кууб хаары тиэйдэ. Итини таһынан 286 кууб хаар атын көлөлөрүнэн ыраастанна. Билигин чааһынай дьиэлэр түөлбэлэригэр ыраастанар". 

Хаар ыраастааһына киин куоракка бу нэдиэлэнэн түмүктэнэрэ былааннанар. Маны тэҥэ суол-иис үлэһиттэрэ буору-кумаҕы ыраастыыллар, суол кытыытынааҕы уу барар лотоктарын, турбалары паардаан бэлэмнииллэр. Онон коммунальнай хаһаайыстыба бары сулуспалара сааскы уулларыы содулун туоратарга, тимир көлөлөөх да, сатыы да дьон табыгастаахтык сылдьалларыгар  дьулуһаллар.