Тутуу эбийиэктэрэ - тус хонтуруолга

Гагарин уулуссатыгар турар икки этээстээх мас дьиэлэри сотору эминэн көтүрүөхтээхтэр. Ол курдук манна турар Гагарина 2,4,6 нүөмэрдээх дьиэлэри уонна өссө эбии Циолковского уулуссаҕа баар хас да хаарбах дьиэни көтүрэн саҥа тутууга бэлэм гыныахтаахтар. Ааспыт 2024 сылга "Аэропорт территориятын сайыннарыы" бырайыагар илии баттанан үлэ саҕаламмыта. Маныаха "Өрөспүүбүлүкэтээҕи ипотечнай агентство" регионнааҕы оператор быһыытынан көһөрүү боппуруоһун сүрүннүүр.   

Лилия Шайнурова, РИА генеральнай дириэктэрэ: "Бу дьиэлэр оннуларыгар атын саҥа бырайыак олоххо киириэҕэ. Ол курдук федеральнай бюджеттан лүөччүктэри бэлэмниир училище тутуллуоҕа. Номнуо сөбүлэҥнэр бааллар. Онон бу миэстэни бэлэмниир сорук турар". 

Бырабыыталыстыба бэрэссэдээтэлин бастакы солбуйааччы Дмитрий Садовников бу оройуоҥҥа дьону көһөрүү балаһыанньатын кэлэн билистэ. РИА тэрилтэ уонна тутуу министиэристибэтэ иһитиннэрбитинэн, манна олохтоохтору кытта кэпсэтии түмүгүнэн 3 дьиэни босхолоон, саҥа дьиэ, биитэр компенсация көрөн үлэ бара турар. Ол эрэн сорох кыбартыыра олохтоохторо турбут усулуобуйаларга сөпсөспөккө, билигин көһөрүү боппуруоһа суутунан быһаарылла сылдьар. Маныаха аны сайыҥҥа диэри үөскэбит балаһыанньа ситэ быһаарыллан бу турар дьиэни көтүрэн саҕалыахтаахтар.

Виктор Романов, СӨ тутуу миниистирэ: "РИА хампаанньаҕа үбүлээһинин көрөммүт билигин 3 дьиэ номнуо босхолонон тураллар. Биирдии иккилии кыбартыыра олохтоохторун кытта суутунан усулуобуйаны быһаарсыы хаалан турар. Ол быһаарылынна эрэ көтүрүү бэс ыйыгар саҕаланыа".  

Салгыы Дмитрий Садовников Жатай бөһүөлэгэр саҥа тутуулары көрдө. Биир бастакынан Жатайдааҕы суудуналары оҥорон таһаарар собуот үлэһиттэригэр анаан тутулла турар уопсай дьиэ тутуутун хонтуруоллаата. Бу уопсай дьиэ тутуута 2022 сыллаахха саҕаламмыта. Ол эрээри кэккэ төрүөттэринэн кэмигэр кыайан тутуллан бүппэккэ, быйыл тутуу үлэтэ салҕананан бара турарр. 7 этээстээх , 96 хостоох, 4 тыһыынчаттан тахса квадратнай миэтэрэ иэнннээх уопсай дьиэ 200 киһи олороругар ананар. 

Виталий Лебедев, тутар тэрилтэ сүрүннүүр исписэлииһэ: "Билигин ис өттүн оҥоруу бара турар. Билигин 5-6 этээскэ муостатын номнуо оҥоро сылдьаллар. Бу сыл 3 кыбаарталыгар бүтэрэр былааннаахпыт".  

Бүгүҥҥү күҥҥэ 20-тэн тахса үлэһит ис-тас үлэтин, инженернэй ситимнэри таҥыыга үлэлии сылдьар. Маннык тэтиминэн аны күһүҥҥэ диэри үлэ үмүрүйэн, уопсай дьиэ бэлэм буолан Жатайдааҕы суудуналары оҥорон таһаарар комплекс үлэһиттэрэ олорор кыахтаныахтара. Оттон собуот тутуутун хаамыытын туһунан сиһилии сарсыҥҥы биэриибитигэр көрүҥ.