Өрүс суолларын сабыллар болдьоҕо бигэргэннэ

Суол сабылларын баттаһа өрүскэ сырыы субуллан олорор. Ордук улахан уйуктаах массыыналар тиэтэйэллэр. Аны 2 күнүнэн 20 туоннаҕа көҥүл олохтонуо. Ириэрии күн аайы мууһу кэбирэтэр, маннык кэмҥэ  алдьаныы ис уонна тас өттүттэн барарын исписэлиистэр этэллэр.

Ол иһин көлөлөр уута суох сиринэн тумнал сылдьаллар. Оттон Саха сирин үрдүнэн бу күннэргэ сааскы халлаан дьиҥ кубулҕатын көрдөрөр. Үгүс улууска ардаата. Ол кэннэ аны күүстээх силлиэ түһэн "Эдьигээн" айан суола быстах кэмҥэ сабылла сырытта.

"Күн-дьыл туруга бастатан туран муус суолларга биллэр. Холобур, бу Даркылааҕынан Аллараа Бэстээххэ туорааһын номнуо уу бөҕө буолбут. Онон кыра массыына сылдьарыгар ыарахаттардаах".

Оттон  Мииринэй оройуонугар 12 кыраадыска тиийэ сылыйан баран, халлаан эмискэ хатаан суол-иис бүтүннүү муус килиэ буолан үгүс күчүмэҕэйдэри үөскэттэ.  Сырыынньа сири дабайаары суоппар көһүйэ буору үлтүрүтэ тамныы сылдьара  куйаар ситимигэр киэҥник тарҕанна. Бу күн Мииринэй, Кэбээйи, Бүлүү бөлөх улуустарыгар  балаһа тыал түргэнэ 15-24 сөкүүндэҕэ бэлиэтэннэ. Маны күнү-дьылы кэтээн көрөөччүлэр сибииртэн хайлыйбыт сыс былыт. 

Саргылаана Никитина, Дьокуускайдааҕы күнү-дьылы кэтээн көрөр  сулууспа күн-дьыл туругун сылыктыыр салаатын салайааччыта: "Бүгүн бу сис былыт мөлтөөн Дьааҥы улуустарыгар ааһыа. Муус устар 8 күнүгэр Уус Майа, Томпо улуустарыгар хаар, инчэҕэй заар түһэрин күүтэбит. Бу кэлэр үс күн өрөспүүбүлүкэ арҕаа эҥээригэр кыра хаардаах тымныы күн-дьыл туруо"

Уопсайынан муус устар устата халлаан уларыйа сылдьар буолуо диэн синоптиктар этэллэр. Үгүс хаардаах, күүстээх тыаллаах күн дьыл туруо. Ол эрэн бу ый нуорматтан сылаас буолара күүтүллэр. Оттон өрүс суолларыгар төнүннэххэ, аны биир нэдиэлэнэн сырыы олоччу тохтуо.

Анатолий Потапов, СӨ Тырааныспар уонна суол хаһаайыстыбатын миниистирин солбуйааччы: "Муус устар 15 күнүгэр туох баар федеральнай суолларга өрүһүнэн туорааһыннар сабыллыахтара. Өрүс сабылынна эрэ Дьокуускай Аллараа Бэстээх хайысханан салгын олбохтоох суудуналар сылдьан саҕалыахтара".

Аны биир нэдиэлэнэн федеральнай муус суоллары тэҥэ өрөспүүбүлүкэ таһымнаах муус суоллар эмиэ сабыллыахтара.  Оттон Саха сирин хотугу уонна Арктика оройуоннарыгар кыһыҥҥы суоллар муус устар 20-25 күннэригэр диэри үлэлиэхтэрэ.