Саха сиригэр Булчут күнүн бэлиэтээтилэр

Саамай сытыы саха быһаҕын туругутан көрөллөр. Булчут күнүгэр үгэс быһыытынан күрэхтэһиилэр хас да хайысханан, түһүмэхтэринэн арахсан ыытыллыннылар.

Бастыҥ саха булчут быһаҕар быйыл 11 киһи, 6 түһүмэххэ күөн көрүстэ. Бүлүү улууһун тимир ууһа оҥорбут саха быһаҕа кимиэхэ да иннин биэрбэтэ.

Александр Терентьев, Саха сирин тимир уустарын түмсүүтүн салайааччыта: "Үлэлэрэ, бэлэрэ сайдаллар. Тургутууну ааһаллара түргэн уонна хаачыстыбалаах буолар. Холобур, таба төбөтүн астаатылар. Урут туйах буоллаҕына, быйыл бастакытын төбө киирдэ".   

Бу күн булчуттар, тус тэрилтэлэр бэйэлэрин үлэлэрин быыстапкаҕа туруордулар. Рустам Федоров булчут күнүн көтүппэт, сылын аайы кыттар. Быйыл да үлэлэрэ элбэх киһи сэнээритин ыллылар.

Рустам Фёдоров, таксидермист: "Бу уустук оҥоһуулаах кыыллар. Муостаахтар тириилэрин уонна муостарын таҥастааһын элбэх бириэмэни эрэйэр".   

Булчут күнүн көрсө өссө биир улахан тэрээһин бөрөһүттэр сүбэ көрсүһүүлэрэ буолар. Манна бастыҥ бөрөһүттэр мустан бэйэ-бэйэлэрин кытта алтыһан, сүбэ-ама, уопут атастастылар.

Пётр Кириллин, Нам улууһун олохтооҕо, булчут: "Уоупт атастаһабыт. Холобур, хапхааны хайдах туруорар туһунан. Оттон мин бэйэм бөрөнү бултааһыҥҥа былааҕы туһаныы туһунан кэпсээтим".    

Быйыл Булчут күнүгэр аан бастакытын бастыҥ киис тириитин күрэҕэ ыытылынна. Манна барыта 30-тан тахса киһи кыттынна. Бу күрэххэ  саарба хайдах быһыылааҕа, өҥнөөҕө, хойуута барыта учуоттанна.

Иннокентий Семёнов, СӨ Биологическай ресурсаларын, айылҕа ураты харыстанар сирдэрин уонна айылҕа пааркаларын дириэксийэтин дириэктэри солбуйааччы: "Биһиэхэ Саха сиригэр икки көрүҥ киис баар. Ол курдук хара уонна сырдык саарбалар".   

Булчут күнүн көрсө дьон-сэргэ тоҕуоруһа мустубут. Уус Алдан улууһун аҕам саастааҕа сааһын ахсарбакка эмиэ кытта элбит. Кини 73 саастаах, ол эрэн билиҥҥээҥҥи диэри бултуур-алтыыр. Быыстапкаҕа мастан уһаммыт үлэлэрин аҕалбыт.

Майыат Кыыдаан, Уус Алдан улууһун олохтооҕо: "Бу үүтээҥҥэ оҥоһуллубут оҥоһук, 20-чэ сыл устата остуолга турбута. Икки сыл үүтээммитин эһэ ыспыта. Ол сылдьан бу аһыытын суолун хааллабарбыт".   

Манан Булчут күнэ түмүктэммэт, бырагыраама киэҥ. Байанай күрэҕэ хас нэһилиэк, улуус ахсын ыытыллар. Бу нэдиэлэҕэ Дьокуускай куоракка саанан ытыыга уонна да атын күрэхтэр буолуохтара.