Өрөспүүбүлүкэтээҕи суһал медиссиинэ киинин эндоскопия салаата тэриллэн үлэлээбитэ быйыл 50 сыла

Аныгы технология көмөтүнэн эндоскопист быраас Ариана Тарасова ыарыһах куртаҕын экраҥҥа көрөр. Киһи ис уорганнарын көрөргө бу саамай үгүстүк туһаныллар ньыма буолар. Эндоскоп тэрилинэн куолай, куртах уонна оһоҕос ыарыытын эрдэттэн булаллар. Ариана Тарасова күҥҥэ маннык 40 тахса киһини көрөр. Араас туруктаах ыарыһахтарга суһал көмөнү оҥорор.

Ариана Тарасова, Өрөспүүбүлүкэтээҕи 2-с №-дээх балыыһа эндоскопист бырааһа: «Биһиги балыыһабытыгар урут оҥоһуллубат гастростоманы оҥоробут. Ону таһынан хас да уустук көрүҥ чинчийиини ыытар буоллубут. Үөс тааһын ылларыы эпэрээссийэтэ 3 төгүл элбээтэ».

Онон эндоскопия отделениета бириэмэни кытта тэҥҥэ хардыылаан билигин эрдэ оҥоһуллубат уустук эпэрээссийэлэри оҥорор буолла. Манна төһүү биллэн турар саҥа тиэхиньикэ, туһааннаах медиссиинэ тэрилэ. Билигин балыыһаҕа аныгы эндоскопия аппаратын үлэлэтэн көрө сылдьаллар.

Лариса Акимова, Өрөспүүбүлүкэтээҕи 2-с №-дээх балыыһа эндоскопист бырааһа: «Бу биһиэхэ “Олимпус” диэн саҥа аппарат боруобаҕа диэн кэлэн турар. Бу тэрил 4К үрдүк хаачыстыбалаахтык көрдөрөр. Мантан ордук аппарат Россияҕа суох».

Бу аппарат билигин дойду үрдүнэн 3 эрэ устуука баар. Билигин балыыһа тустаах тэрили ыларга кэпсэтиини ыытар. Оччотугар эндоскопия нөҥүө үгүс ыарыыны эрдэттэн быһаарар кыах үөскүүр. Манна даҕатан эттэххэ, отделение сыллата материальнай техническай базата кэҥиир. Маны тэҥэ быраастар тиһигин быспакка саҥа эмтиир ньымаларга уонна саҥа тэриллэри туһана анал үөрэҕи ааһаллар.

Зоя Яковлева, Өрөспүүбүлүкэтээҕи 2-с №-дээх балыыһа эндоскопия салаатын сэбиэдиссэйэ: «Бу кэнники сылларга саҥа эдэр хирурдар кэлбиттэрэ. Олору биһиги хайаан да үөрэттэрэ ыытабыт. Ааспыт нэдиэлэҕэ мин Санкт-Петербург куоракка баран кэллим. Онно сыл аайы улахан форум буолар. Онно тиийэн элбэҕи билэбит, көрөбүт-истэбит. Онтон кумааҕы, кинигэ бөҕө соһон аҕаламмын манна салаабытыгар кэпсиибин».

Күн бүгүн эндоскопия салаатыгар 8 быраас, 10 сиэстэрэ уонна 4 санитарка үлэлиир. Суһал медиссиинэ киинэ буолан күннэтэ өрөспүүбүлүкэ араас муннугуттан ыарахан туруктаах ыарыһахтарга суһал көмөнү оҥороллор. Эндоскопия салаата киһи этин-сиинин саамай сүрүн уорганнарын ыарыытын эрдэттэн сэрэтэр сыаллаах үлэлиир.