Гаврил Чиряев төрөөбүтэ 100 сылын бэлиэтээһин үрдүк таһымнаахтык ааста

Дьокуускай куоракка Гаврил Чиряев аатын сүгэр уулуссаҕа турар кини пааматыньыгар салалта, депутаттар, Бүлүү улууһуттан биир дойдулаахтара, общественность уонна ыччат кыттыылаах бырааһынньыктааҕы миитин буолла. Тэрээһиҥҥэ Гаврил Иосифович Саха сирин сайдыытыгар киллэрбит сүдү кылаатын бэлиэтээтилэр.

Анатолий Чиряев, Дьокуускайдааҕы национальнай гимназия дириэктэрин солбуйааччы: "Элбэх эдэр ыччат кэлбитэ олус кэрэхсэбиллээх. Биһиги улуу убайбыт Гаврил Иосифович үрдүк аатын үйэтитэ сылдьыахпыт ".

Гаврил Чиряев өрөспүүбүлүкэбитин 1965 сыллаахтан 1982 сыллаахха салайан кэлбитэ, үгүс хайысхалар сайдыыларын акылаатын тус бэйэтинэн көҕүлээн киллэрбитэ. Ол курдук алмаас, көмүс, хорҕолдьун, тас чох хостооһунугар киин болҕомтотун ууран үлэлэспитэ. Кини салалататынан энергетика уонна гаас промышленноһа, Нерюнгри куората төрүттэммитэ. Гаврил Иосифович 100 сыллаах үбүлүөйүгэр бэлэмнэнэн дойдутугар Бүлүү улууһугар кини музейын кэҥэтии, саҥардыы ыытыллар. 

Михаил Томский, Г.И.Чиряев музейын дириэктэрэ: "Гарил Иосифович Чиряев улааппыт Ураһалаах диэн сиргэ улахан үлэни ыыттыбыт. Ол быһыытынан суол оҥорбуппут. Улахан аллея оҥордубут уонна улахан арка туруордубут. Дьиэтин хаартыскатын буламмыт, онтон кээмэйин көрөммүт олорбут дьиэтин туттубут". 

Үбүлүөйдээҕи биир бэлиэ тэрээһининэн Саха сирин күндү таастарын, металларын фондугар кини аатын сүгэр уһулуччу улахан алмааһы дьон дьүүлүгэр туруорбуттара буола. Бу алмаас 30 сыл анараа өттүгэр Мииринэй улууһугар булуллубута.

Андрей Захаров, СӨ күндү таастарын, металларын фондун эскпозицияҕа турар баайыгар салаатын салайааччы: "1995 сыллаахха Удачнайга булуллан турар. Ол сыл “Россия уонна Саха алмаастара” Ауо бирикээһинэн Гаврил Иосифович сырдык аата үйэтитиллэн турар". 

Дьокуускайга үбүлүөйдээҕи дьоро күнү киэҥ далааһыннаахтык бэлиэтээтилэр. Кинигэ, киинэ сүрэхтэниитэ, быыстапкалар аһыллыылара, дьоро киэһэ элбэх дьону түмтэ. "Россия - мин историям" музейга интерактивнай быыстапкаҕа архыып каадырдарын, Гаврил Иосифович олоҕун туһунан билсиэххэ сөп. Бар дьон ахтыытынан, кини үрдүк професиональнай таһымнаах, дириҥ билиилээх, чаҕылхай, бэйэтин тылын ылыннарар салайааччы этэ.

Семён Иванов, үп-экономика коллеһын дириэктэрин солбуйааччы: "Үйэтитии билигин өссө күүскэ барыа диэн эрэнэбин, 100 сылын туолуутунан түмүктэнэн хаалбакка". 

Аҕа дойду сэриитин кытыылааҕа, дэгиттэр салайааччы Гаврил Чиряев норуотугар, дойдутугар оҥорбут үтүөтэ үйэлэргэ умуннуллуо суоҕа.