17 кыбаарталга бастакы таас дьиэ тутуута салҕанар

Сыбаайа барыта анньыллан, бастакы этээһи кутууга бэлэмнээһин үлэтэ барар. Бу 17 кыбаарталга, билиҥҥитэ "Спортивнай" диэн ааттанар, дьоҕус түөлбэҕэ бастакы  таас дьиэ. Үлэ тэтимнээхтик барар, ситтэҕинэ-хоттоҕуна 12 мэндиэмэннээх буолуохтаах тутуу үлэҕэ бу сыл бүтүүтэ киириэҕэ. Онон Дьокуускай куоракка саамай элбэх хаарбах дьиэлээх кыбаарталга, дьэ, хамсааһын тахсан эрэр.

Семён Потапов, Өрөспүүбүлүкэтээҕи ипотека агенствотын көһөрүүгэ салаатын салайааччы: "Быйыл биһиги уонча дьиэни көһөрүөхтээхпит. Билигин алта дьиэни кытта үлэлии сылдьабыт. Быйыл уопсайа 160-ча квартираны көһөрүөхтээхпит. “Спортивнай” түөлбэ олохтоохторун “Звезднай” түөлбэҕэ көһөрөбүт. Биүиги онно 8 дьиэни туппуппут". 

17 кыбаарталы көһөрүү уонна  тутуу Уһук Илин куораттарын сайыннарыы тосхолугар киирэн федеральнай инфраструктурнай бюджет кредитынан үбүлэнэр. Бу түөлбэҕэ уопсайа 166 дьиэ баарыттан 154 хаарбах туруктаах. Манна барыта  2500 дьиэ кэргэн олорор. Көһөрүүнү ылсыбыт бэдэрээттээх тэрилтэ этэринэн, 2030 сылга диэри сорук толору туолан, биир да мас дьиэ суох буолуохтаах.

Оттон быйыл көһөрүү бырагырааматын иккис түһүмэҕин түмүктүүр суолталаах сыл. 5 сыл устата 56 тыһыынча киһини көһөрөр сорук турбута. Ол онтон  күн бүгүн 46 тыһыынчата номнуо олорор усулуобуйатын тупсарда.  Итини сэргэ быйыл өссө 5 тыһыынча киһи хапсара күүтүллэр.

Евгений Степанов, СӨ олорор дьиэни тутуу дирекциятын салайааччытын солбуйааччы: "Хомойуох иһин, быйыл бары бүппэттэр. Биллэн турар, үбүлээһин тиийбэт, бүҥүҥҥү күҥҥэ 24 млдр. суумма итэҕэстээхпит. Ити чааүыгар биһиэхэ Территориялары сайыннарыы пуондата көмөлөһөр. Холобур,ааспыт сыл ахсынньытыгар 1,6 млдр. көрбүтэ".  

Быйыл сүрүннээн улуустарга көһөрүү бырагырааматынан дьиэлэр үлэҕэ киириэхтэрэ. Ол курдук улахан үлэ Алдаҥҥа, Мэҥэ Хаҥаласка, Анаабырга, Өлөөҥҥө бара тураллар. Ол этэр Саха сиригэр  быйыл уопсайа 75 дьиэ туһааннаах бырагырааманан тутуута түмүктэниэ.

" Көһөрүү быйылгыттан саҥа бырагырааманан салҕаныа. Манна 2017-2022 сс. хаарбах ахсааныгар  киирбит дьиэлэр хапсыахтара. Күн бүгүҥҥү туругунан Саха сиригэр маннык 3900 дьиэ баар".

Оттон билигин сокуоҥҥа уларыйыы киирэрэ күүтүллэр. Оччоҕо 1900 мөл кыбаадыраатынай миэтэрэ иэни Дьокуускайга 30 сылга диэри көһөрөр сорук турар. Манна саамай сытыытык хаарбах уонна саҥа бэриллэр дьиэ сыанатын араастаһыытын тула дьүүллэһии барар. Билигин регионнарынан ырытыһыы барар турар.