Кыайыы 80 сылын көрсө дьоруойдар ааттарын үйэтитии үлэтэ салҕанар

77

Главное

Бу өтөхсүйэн турар дьиэни 1965 сыллаахха Федор Охлопков Сэбиэскэй сойуус Дьоруойа буолбутугар оччотооҕу олохтоох былаас тутан биэрбитэ.  Манна Охлопковтар 10 оҕолорун кытта быр-бааччы олорбуттара. Онон Николай Федорович оҕо сааһын үтүө өйдөбүлэ манна  ааспыта. 

Николай Охлопков, Сэбиэскэй Сойуус Дьоруойа Фёдор Охлопков уола: «Сайынын аан бастаан интернатка үлэлээбитим. Оскуола учаастагар оҕуруот аһын үүннэрэр этилэр. Хамнас харчынан уонна бородууктанан биэрэр этилэр. Дьиэбитигэр аҕам сыарҕанан тиэйэн илдьэн үөрүү-көтүү бөҕө буолар этибит».

Дьоллоох оҕо сааһа ааспыт дьиэтэ билигин өтөхсүйэн турарыттан санаарҕыыр. Төһө да сэрии кэннэ тутуллубутун иһин бу уһаайбата, чуолаан историческай сыаннастаах. Мантан 1941 сыл атырдьах ыйыгар Федор Охлопков уоттаах сэриигэ аттаммыта. Оттон 1945 сыллаахха бу манна кыайыыны аҕалбыта. Онон оҕолорун биир ыра санаалара бу дьиэни чөлүгэр түһэрии буолар.

Оттон Кириэс Халдьаайытааҕы кыраайы үөрэтэр түмэл тэлгэһэтигэр Охлопковтар эргэ дьиэлэрин көһөрөн түмэл оҥорбуттара. Манна Федор Матвеевич туһунан үгүс архыып докумуоннара, матырыйааллар бааллар. Даҕатан этэххэ, Кириэс Халдьаайыга Дьоруой аатын үйэтитиигэ сүҥкэн үлэ ыытыллар. Олохтоох оскуола Федор Охлопков аатын сүгэр. Маны тэҥэ ытар тир биллэн турар эмиэ улуу снайпер аатынан.

Сардаана Никитина, буулдьанан ытыыга тренер: «Биһи тирбытыттан 9 Арассыыйа маастара баар, 11 маастарга кандидат уонна 6 Саха сирин маастара тахсыбыттара».

Улуу Кыайыы 80 сылын Томпо улууһа киэҥ далааһыннаахтык ыларга бэлэмнэнэр. Тустаах улуус Аҕа дойду сэриитин кытта быһаччы сибээстээх. Ол курдук, Теплый Ключ аэродромунан Аляска-Сибирь авиатрасса ааһар этэ. Сэрии кэмигэр үгүс байыаннай самолет Томпо улууһунан көтөн ааһара. Онон манна үгүс элбэх мэҥэ таас, историческай пааматынньыктар бааллар. 

Михаил Неустроев, Томпо улууһун депутаттарын сүбэтин бэрэссэдээтэлэ: «Оҕолорго патриотическай тэрээһиннэри ыытабыт».

Онон ким да аата, туох да умнуллубат. Үйэтитии үлэтэ бүтүн өрөспүүбүлүкэ үрдүнэн салҕанан барар.

Читайте также