ХИФУ быйылгы туттарсааччыларга уонна устудьуоннарга анаммыт аһаҕас аан күнүн тэрийдэ

Дьокуускай куорат саха-политехническай лицейын 10 кылааһын үөрэнэччитэ Эльдар Потапов ханнык үөрэххэ киирэрин номнуо быһаарынан сылдьар. Кини Хотугулуу-Илиҥҥи федеральнай университет тэрийбит аһаҕас аан күнүгэр кылааһыттан 10 буолан кэллилэр.

Эльдар Потапов, саха политехническай лицей 10-с кылааһын үөрэнээччитэ: «Юридическай өттүнэн үөрэх көрө кэллим».

Саха сирин саамай сүрүн үөрэҕин кыһата - Хотугулуу-Илиҥҥи федеральнай университет быйыл уонунан идэҕэ факультеттарыгар, институттарыгар саҥа устудьуоннарын күүтэр. Ону билиһиннэрэр сыаллаах бу үгэскэ кубулуйбут тэрээһиҥҥэ сүүһүнэн оскуола үөрэнээччитэ, алын куурус усудьуоннара кытыннылар. Физико-техническай институт уопсайа 8 араас идэҕэ уһуйар.   

Владлен Кононов, физико-техническай институт алын научнай сотруднига: «Араас өттүнэн киириэххэ сөп. Хайаан да физика эрэ буолбатах, информатика эмиэ. Холобур, педагог, ювелир, инженер, энергетика өттүгэр эмиэ исписэлиис буолаллар».

Быйыл университекка туттарсыы быраабылаларыгар федеральнай ирдэбилинэн саҥардыы, итиэннэ докумуонары тутуу болдьохторугар уларыйыылар киириэхтэрэ. Ол курдук, тус ситиһиилэрин көмөтүнэн баалгын эбэр кыах баар буолбут, итиэннэ докумуоннары Госуслуги портал нөҥүө туттарыы хайысхата кэҥээбит.

Пётр Кычкин, ХИФУ киин тутар хамыыһыйатын салайааччытын солбуйааччы: «Суперсервиз ВУЗ онлайн диэн Госуслуганан докумуон биэрэр буоллахха. Онон бакалавриатка уонна специалитетка эрэ буолбакка орто үөрэххэ, магистратураҕа, аспирантураҕҥа эмиэ биэриэххэ сөп буолуоҕа. Абитуриеннар зачисление кэмигэр аттестат, диплом оригинал оннугар заявление на зачисление суруйаллар эбэтэр Госуслугаҕа галочка туруоруохтарын сөп».

Биллэн турар идэни, үөрэҕи талыы хас биирдии оҕоҕо уустук боппуруос. Сатаан быһаарыммакка сылдьааччыларга анаан университет психологическай көмөҕө киинэ тустаах тест толотторон тута түмүк таһаарар.

Светлана Тимофеева, ХИФУ психологическай көмө киинин психолога: «Экспресспрофдиагностика, углубленнай да оҥоробут. Бүгүн элбэх оҕолорго түргэнник оҥоробут, икки тест ыыттыбыт».

Бэлиэтээн эттэххэ, универистет иһинэн байыаннай үөрэтэр киин баар. Манна уолаттар үөрэхтэрин кытта дьүөрэлии байыаннай үөрэхтэһини ааһан бириэмэлэрин сүүйэр кыахтаахтар. 

Владислав Пудов, ХИФУ 4-с кууруһун устудьуона: «Үөрэхтэрин кытта армияларын ааһаллар. 1,5 манна үөрэнэллэр, нэдилэҕэ биирдэ сылдьаллар. Оннук сылдьан биир ыйга армияҕа баран кэлэллэр, диплом ылалларыгар военнай билиэт ылаллар».

Оттон университет киин тутар хамыыһыйата бу сылга үлэтин бэс ыйын 20 күнүттэн саҕалыаҕа.