Сайсары күөлгэ өрөспүүбүлүкэтээҕи "Аҕа күрэҕэ-2025" ыытылынна

Сайсары күөлэ оргуйан олорор. Маһы суорааһыҥҥа тыҥааһыннаах киирсии. Бастакынан 10 хамаанда түһүлгэҕэ тахсан күөн көрсөр.

Үөһээ Бүлүүттэн сылдьар Петровтар дьиэ кэргэн аҕа баһылыга Айсен Егорович уолунаан Арсенныын бастакы 10 хамаандаттан тэҥнээхтэрин булбатылар. Аа-дьуо саҕалаабыттара эрээри,ыалдьааччыларын хаһыыта-ыһыыта, өйөбүлэ күүс-уох биэрэн эр дьон  ортотуттан тэтимирэн, биир тэҥник туттан-хаптан бастаан таҕыстылар. 

Арсен Петров, күрэх кыттыылааҕа: «Баарбынан-суохпунан түһүннүм, таалым анньан диэн, нэһиилэ турабын. Саамай ыарахан түһүмэх дии саныыбын».

Айсен Петров, күрэх кыттыылааҕа: «Долгуйан, улаханнык сылайбатым».

Бу көрүҥү кыттааччы үгүһэ ыарырҕатар эбит. Киһи ордук сэниэтэ баранар, итиэннэ аны сэрэнэн туттуохха-хаптыахха наада. Таатта улууһун хамаандатыгар ыалдьааччы эмиэ үгүс. Герман Жегусов уолунаан Германныын бу түһүмэххэ эмиэ биир бастыҥ көрдөрүүлээхтэр. Жегусовтар элбэх оҕолоох дьиэ кэргэн.

Герман Жегусов, күрэх кыттыылааҕа: «Биэс оҕолоохпут, бу улахан уолум. Былырыын эмиэ өрөспүүбүлүкэтээҕигэ кыттыбыппыт».

Манна даҕатан эттэххэ быйылгы күрэххэ хамаандалар үгүстэрэ элбэх оҕолоох ыал аҕалара. Онон тэрээһин таһыма өссө үрдүүр. Холобура аҕа күрэҕин 3 төгүллээх кыайыылааҕа Петр Романович Чупров икки уолун кытыннара сылдьыбыт. Уонна иккиэннэрин кытта бастыы сылдьыбыт. Оттон бу кыайыылар уол оҕону сөпкө иитииттэн кэлбитэ диэн этэр.

Пётр Чупров, Өрөспүүбүлүкэтээҕи аҕа күрэҕин 3 төгүллээх кыайыылааҕа: «Аҕа буолалларыгар бэлэмнииргэ диэн уолаттарбын кыра эрдэхтэриттэн туох баар үлэни барытын үлэлэтэн, барытыгар тэҥҥэ илдьэ сылдьабын».

Күрэхтэһии 7 түһүмэҕинэн ыытылынна. Уол оҕону эр киһилии иитиигэ, үлэҕэ сыһыарыыга аналлаах күрэхтэр буоллулар. Хамаандалар бары күүстээх бэлэмнээхтэрэ көстөр. Оттон бу тэрээһиҥҥэ 19 аҕа уолунаан өссө чугас буолбуттара буолуо диэн саарбаҕа суох.