Дьокуускайга "Я - агромиллионер" диэн идэ дьаарбаҥката ыытылынна

Биир сиртэн өрөспүүбүлүкэ хайа баҕар муннугар үлэ булар кыах үөскүүр. Бастакытын ыытыллар "Я - Агромиллионер" регионнар икки ардыларынааҕы идэ дьаарбаҥката тута киэҥ хабааннаахтык үлэтин саҕалаата. Тэрээһиҥҥэ ыраах хоту улуустартан, ыаллыы регионнартан кытта кыттааччылар кэлбиттэр. Кэбээйи улууһун "Сайылык" хаһаайыстыбата номнуо күн аҥаарыгар диэри хас да сайаапканы ылбыт.

Пётр Дьяконов, "Сайылык" хаһаайыстыба бэрэссэдээтэлэ: «Үчүгэй баҕайы тэрээһин, аҕыйах оҕо кэлэн суруттарда. Зоотехник-технолог уонна сүрүнүн ыанньыксыттар, механизатордар элбиэхтэрин наада».

Маннык кыһалҕа бары хотугу оройуоннарга көстөр. Дьааҥы улууһа эмиэ бу идэлэргэ исписэлиис көрдөнө кэлбит. Онон технологтарга таларга кыах киэҥ.

Иван Корякин, үлэ көрдөнөөччү: «Мин Кэбээйи СХПК “Сайылык” тэрилтэни көрдүм уонна Гормолзаводу көрдүм».

Оттон бу тэрээһиҥҥэ оскуола оҕолоро үөрэх кыһаларын кытта билсэллэр. Маныаха тыа хаһаайыстыбатынан дьарыктаныы инникилээҕин, эргиэн биир көрүҥэ буоларын үөрэнээччилэргэ, дьаарбаҥка кыттыылаахтарыгар Бэрдьигэстээхтэн кэлбит 8 кылаас үөрэнээччитэ Герман Бережнов кэпсиир. Кини үһүс сылын перепелкаларынан дьарыктанар. Бэйэтэ бу көтөрдөрү тутар уйа айбыт, итиэнэн билигин сымыытын атыылаан бизнеска бастакы хардыылары оҥорор.

Герман Бережнов, С.П. Данилов аатынан Бэрдьигэстээх орто оскуолатын үөрэнээччитэ: «Бырайыагым технологияҕа олоҕурар. Бэйэтэ уулатар, аһатар, ыраастыыр. Бырайыагым кэҥэтиигэ барда».

Дьаарбаҥка уопсайа 140 кыттааччыны түмтэ. Ону таһынан 300 тахса киһи үлэ көрдөннө. Тэрээһин сүрүн соруга тыа хаһаайыстыбатын бизнеһы кытта дьүөрэлии тутууну ыччакка иҥэрии. Ол инниттэн туһааннаах биэдэмистибэлэри кытта үс өрүттээх сүлэҥ түһэрилиннэ.

Артём Александров, СӨ тыа хаһаайыстыбатын миниистирэ: «Ыччаттарбыт ханнык баҕары салааннан тыа сиригэр төннүөхтэрин сөп».

Инникитин бу тэрээһини өссө кэҥэтэн ыытар сорук турар.