Булчут күнүн чэрчитинэн өрөспүүбүлүкэтээҕи "Байанай" күрэҕэ ыытылынна

96

Главное

Сибиэһэй салгын, саа доҕор - булчут киһиэхэ маннааҕар ордук туох баар буолуой? Байанайга сүгүрүйээччиллэр Намныыр аартыгар муһуннуллар. Күн бүгүн булт диэн баран муннукка ытаабыт эр бэртэрин күрэҕэ үгүс элбэх дьону муста.

50 миэтирэ ыраахтан кыра саанан ытыыга күрэххэ үстүү буолан туран сыалы ыттыллар. Төһө да тыал турдар, кыттааччылар үчүгэйдик сорудахтарын толороллор. Салгыы уһуҥҥа ытыы, тыҥааһыннаах киирсиилэрэ буоллуллар. Манна холобура, кыттааччы хайдах ыппытын бэрэбиэркэлииргэ судуьуйалар массыынанан тиийэн түмүктэри көрөллөр.

Афанасий Дарбасов - күрэх судьуйата: «300 миэтирэҕэ “Тайах” диэн упражненияны ытан саҕалаатылар. Нам кыттааччыта бастаан иһэр. Уолаттар үчүгэйдэр, биир да мэлийбит киһи суох».

Чахчы, тэрийээччиллэр бэлиэтииллэринэн сыллата кыттааччылар таһымнара үрдүүр. Сылын аайы күрэхтэһэр уолаттар үөрүйэхтэрин үрдэтэ син биир кытталлар. Холобура, Мэҥэ-Хаҥалас сүүмэрдэммит хамаандатын чилиэнэ Семен Сенин спортинг көрүҥэр иннин кимиэхэ да биэрбэтэ.

Семён Сенин, күрэх кыттааччыта: «Дьарыктаммытым үс сыл курдук буолла. Күрэхтэһиилэргэ кыттабын. Иккис уонна үһүс миэстэ ыла сылдьыбытьым. Быйыл дьэ кыайдым».

Манна даҕатан эттэххэ, күрэх булт кэһиллибэт быраабылатынан олоччу барар. Хас биирдии түһүмэх аайы кыттааччылар охотбилиэттэрин, сааларын саадахтарын көрдөрөллөр. Ол эрэ кэнниттэн күрэхтэһиэхтэрин сөп.

Владимир Решетников, күрэҕи тэрийээччи: «Быйыл 28 төгүлүн ыытыллар. Былырыын Чурапчы улууһун хамаандата кыайбыта».

Маны кытары Байанай күрэҕэр ытыыга эрэ буолбакка, уоту оттоһууҥҥа, чэйи өрөөһүҥҥэ мас хайытааһыҥҥа онтон да атын булчут киһи сатыахтаах үөрүйэхтэригэр түһүмэхтэр буоллуллар. Манна хамаандалар туох баар маастырыстыбаларын көрдөрдүлэр. Оттон хас биирдии улууска эмиэ түһүмэхтэр ааспыттара.

Алексей Петров, күрэх кыттааччыта: «Ойуун ууһа хамаандата улууһугар бастакы миэстэни ылан кэлэн кытта сылдьар».

Оттон тустаах күрэхтэһии булт суоруллубат сокуонун тутуһарга итиэннэ булчуттары түмэргэ-сомоҕолуурга анаан сыллата кулун тутар ыйга ыытыллар.

Читайте также