Уус Буотама бизоннары иитэр паркаҕа туристарга сезон арылынна

Сааскы ылааҥы күнү бизоннары кытта атаарыы. Уус Буотамаҕа сарсыардаттан толору киһи. Анатолий Михайлович Емельянов кэргэнинээн аан бастакытын бу бизонарийга кэлбит.

Анатолий Емельянов, Покровскай куорат олохтооҕо: "Бүгүн күммүт туран биэрдэ, олус сылаас, тыала суох. Биһиги бүгүн аан маҥнайгы ыалдьыттарбыт быһылаах. Бастаан бэйэбит эрэ этэ. Онтон хачыкаат оскуолатын оҕолоро кэллилэр. Биһиги манна бастакыбытын сылдьабыт".

Оттон Анатолий Михайловичтааҕы бизонарийга Хачыкаат олохтооҕо  Саргылаана Васильевна Исакова аҕалбыт. Кини аймахтарыгар төрөөбүт дойдутун биир бастыҥ сынньанар сирин көрдөрө сылдьар. Саргылаана Васильевна ис сүрэҕиттэн бу Уус Буотамаҕа туризм сайдарын туһугар ыалдьар.

Саргылаана Исакова, Хачыкаат олохтооҕо: "Манна айылҕата барыта хатыҥ чараҥ. Аҥаардас хайатын көрүҥ. Бу Күөх Хайа дэнэр. Буотама олус кэрэ айылҕалаах дойду. Манна туризм сайдар кэскиллээх. Семен Семенович бэйэтэ үөрэтэн бардаҕына, аныгы оҕолор саҥалыы көрүүлээх ылыстахтарына кэҥээн барыа этэ ".

Кырдьык да, Уус Буотама бизонарийга туризм хайысхата сайдыах тустаах. Бизон аан дойдуга саамай сэдэх, сүтэн эрэр кыыллартан биирдэстэрэ. Тыа бизона Канадаҕа эрэ баар, онно 4 тыһыынча кэриҥэ төбө ааҕыллан турар. Онтон  Саха сиригэр 2006 сыллаахха бу Уус Буотамаҕа аан бастаан  30 төбөнү аҕалан олохсутан саҕалаабыттара. Аан бастаан 30 бизон кэлбит эбит буоллаҕына, билигин  кинилэр уопсай ахсааннара 250 сыыппараны куоһарбыт. Манна Буотамаҕа ууһуур-тэнийэр бизоннар тутуллаллар, салгыы оҕолору атын питомниктарга  көһөрөллөр. Билигин бу Уус Буотамаҕа 40 бизон баар.

Семён Егоров, "Уус Буотама" бизоннары тутар айылҕа пааркатын салайааччыта: "Манна уон оҕону туспа хаайан турабыт. Онтон биэһин Магадаҥҥа ыыттыбыт. Хаалбыт биэс Тыымпынайдыахтаах. Сыллата оҕолорун эрдэ араартыыбыт. Онтон карантин кэннэ, бэтэринээр көрүүтүн толору барар, Россельхознадзор көҥүл биэртин кэннэ атын региоҥҥа айаҥҥа туруналлар".

Бизонарийга кыстык этэҥҥэ ааһан эрэр. Манна даҕатан эттэххэ, бизоннарга кыстык ынах-сүөһүгэ курдук ыам ыйын бүтүүтэ өрүс мууһа уһуннаҕына түмүктэнэр.

"Муус устар ый ортотуттан бизоннарга төрүөх саҕаланар. Онон билигин тыһылар атыырдартан туһунан тураллар. Быйыл питомникка быһа холуйан 10 төрүөҕү кэтэһэллэр", - Ирена Осипова, корреспондент.

Онон бизон ахсаана сыыйа элбии турар. Күн бүгүн Саха сиригэр 3 питомник үлэлиир. Бу Хаҥаласка Уус Буотамаҕа, Горнайга Тыымпынайга уонна Сунтаарга. Билигин барыларыгар туристарга анаан саҥа сезон арылынна.