Таттарар ыарыылаахтар кииннэрэ арыллан, эмтэнии тэтимирдэ

Бүлүү улууһун Чинэкэ нэһилиэгин олохтооҕо Анастасия Семенова сиэнин эпилептологическай кииҥҥэ көрдөрөр сылдьар. Сиэнэ төбөтүгэр кистаалаах төрөөн, эпилепсиянан ыалдьар. Онон быраастарга хонтуруолга сылдьар. Сыллата тустаах эмтэниини, кэтээн көрүүнү ааһар.

Анастасия Семёнова, Бүлүү улууһун олохтооҕо: "Сыл аайы көрдөрүнэ кэлэбит. Онно кэллэхпитинэ чинчийии түмүгүнэн эмпитин аныыллар". 

Бу Өрөспүүбүлүкэтээҕи бастакы 1№-дээх балыыһаҕа ааспыт сылтан Саха сиригэр соҕотох биир кэлим эпилептологическай киин аһыллан үлэлиир. Манна оҕолорго уонна улахан дьоҥҥо туһааннаах көмөнү оҥороллор. Эпилепсия ниэрбэ систиэмэтин тарҕаммыт ыарыыларыгар киирсэр. Кииҥҥэ оҕолору улуустартан  анаан ыыталлар.

Евгения Иванова, невролог-эпилептолог быраас: "Эпилепсия ыарыыта оҕолорго элбэхтик көстөр. Бу ыарыы арааһа элбэх. Ону ирдэнэр чинчийиини оҥорон, сөптөөх эмин анаатахха эпилепсия ааһар. Ол туһуга быраас уонна төрөппүт тэҥҥэ үчүгэйдик үлэлиэхтэрин наада".

Саха сиригэр балтараа тыһыынча оҕо эпилепсиянан ыалдьара биллэр. Манна кииҥҥэ эпилепсия диагноһын чопчу туруораллар. Билигин диагностика ньымалара сайдан турар кэмэ буолан, таттарыы ыарыытын чопчу быһаарыы бэрт суолталаах. Бу ыарыы төрүөтэ элбэх. Олор истэригэр мэйии төрүөҕүттэн кээһэниитэ, перинатальнай ыарыылара, оһолго мэйии эчэйиитэ, нейроинфекция киирэллэр.

Галина Пшенникова, ХИФУ МИ неврологияҕа уонна психиатрияҕа кафедратын доцена: "40 тахса көрүҥ баар. Хас эрэ саастарыгар ыалдьар көрүҥ кытта баар. Олор улааттахтарына ааһар. Оттон саамай ыарахан көрүҥнэр киһи олоҕун тухары хаалаллар". 

Улахан дьону ылар эбит буоллахха, өрөспүүбүлүкэ үрдүнэн быһа холуйан 4,5 тыһыынча кэриҥэ киһи эпилепсия диагностаах. Биир сыл иһигэр саҥа кииҥҥэ 600-тэн тахса киһи кэлэн көрдөрүнэн ааспыт. Маныаха исписэлиистэр бэлиэтииллэринэн, ыарыы көрдөрүүтэ сыллата үрдүү турар.

Күннэй Осипова, эпилептолог быраас: "Эпилепсия ыарыытыттан үгүс дьон кыбыстар, сорох ардыгар психиатрическай ыарыы курдук ылыналлар. Оннук буолбатах. Кэмигэр эмтэниэххэ эрэ наада". 

Таттарыы ыарыыта олус уһуннук  эмтэнэр. Онон санааны түһэрбэккэ, быраас сүбэтинэн барытын ылыннахха бэринэр ыарыы.