Быйыл балтараа тыһыынчаттан тахса ыал социальнай гаастааһыҥҥа хапсыа

Күүтүүлээх, кэтэһиилээх күөх төлөн холбонуутун түгэнэ. Кыраан арылынна, ол аата бу күнтэн ыла бу ыал гаастанна. Туһааннаах үлэһиттэр барытын көрөллөр-истэллэр, хас биирдии туттаһыгы кытаатыннаран биэрэллэр.

Михаил Захаров, "Сахатранснефтегаз" АУо маастара: "Көрөргүт курдук, ыалга гаас холбонно. Үлэ барыта иһиттэн саҕаланар. Онтон бу таһыттан барытын бэрэбиэркэлээн баран холбуубут".

Бу Мархаҕа Солнечнай диэн түөлбэҕэ гаас ситимэ былырыын күһүн кэлбитэ. Онтон ыла сайаапка быһыытынан социальнай гаастааһын бырагырааматынан ыаллар холбоноллор. Бу түөлбэни быйыл толору гааска холбуур сорук турар. 

"Дьокуускайга быйыл 971 ыал гааска холбонуохтаах уонна олорор усулуобуйатын тупсарыныахтаах. Билигин былааннаммыттан 77 ыал номнуо социальнай гаастааһыҥҥа холбонно. Олор истэригэр бу бүгүҥҥү аадырыс".

Үлэһиттэр аны ис өттүгэр хочуолу бэрэбиэркэлээһиҥҥэ, счетчигы пломбалааһыҥҥа киирэллэр. Бу ыал күөх төлөн кэлиитин 12 сыл устата кэтэспит, өр кэмҥэ чоҕунан оттуу кэннэ бүгүн бэлиэ күн.  

Күөх төлөн сандаара түһэр. Ханан да кээһэнии суох, төлөн барыта тэҥ. Ол аата холбооһун түһүмэҕэ барыта этэҥҥэ ааспыт. Бу ыал социальнай гаастааһыҥҥа сайаапканы иллэрээ сыл биэрбит. Кыһын устата барыта ситэн-хотон дьэ түмүктүүр түһүмэххэ кэллэ.

Михаил Захаров, "Сахатранснефтегаз" АУо маастара: "Балаҕан ыйыттан үлэтэ саҕаламмыта. Дьэ уонна бүгүн күөх төлөн уота холбонно. Систиэмэлэрэ бэлэмэ суох, онон бэрэбиэркэлээн баран оһоҕу эрэ холбоотубут".

Сыл саҕалыаҕыттан өрөспүүбүлүкэ үрдүнэн уопсайа барыта 164 ыал социальнай гаастааһын бырагырааматынан күөх төлөҥҥө холбонно. Оттон быйылгы сыл  былаана 1557 дьиэ. Ол иһигэр Дьокуускайга Покровскайдыыр суол, Сайсары, Марха түөлбэлэрин дьиэлэрэ гаас ситимигэр холбонуохтара. Маны сэргэ улуустарга улахан үлэ барыа.

Валерий Слепцов, "Сахатранснефтегаз" АУо техническэй холбооһун салаатын салайааччытын солбуйааччы: "Улахан бырайыактары этэр буоллахха, Мэҥэ Хаҥаласка сыымах, Лоомтука нэһилиэктэр, Ленскэйгэ Чанчык диэн түөлбэ, Горнай Бэрдьигэстээҕэр уонна Чурапчыга “10 пусковой комплекс” диэн киириэхтээхтэр үлэҕэ".

Санатан эттэххэ, социальнай гаастааһын бырагыраамата 2021 сылтан үлэлиир. Манна ким баҕар сайаапка түһэрэн чэпчэтиинэн туһанар кыахтаах. Сүрүн ирдэбил - гаас ситимэ тардыллыбыт буолуохтаах.