Саха сиригэр Култуура үлэһиттэрин күнэ киэҥ далааһыннаахтык бэлиэтэннэ

Саха сиригэр Култуура үлэһиттэрин күнүн киэҥ далааһыннаахтык бэлиэтээтибит. Үгэс быһыытынан бу бэлиэ күҥҥэ култуура эйгэтин үлэһэттэригэр судаарыстыбаннай наҕараадалары туттардылар, бэтэрээннэри чиэстээтилэр.

Ольга Харайбатова култуура эйгэтигэр үлэлээбитэ 50 сыл буолла. Кини Саха өрөспүүбүлүкэтин култууратын уонна ускуустуба бочуоттаах үлэһитэ үрдүк аатын тутта. Култуура эйгэтигэр үлэлиир киһи сырдыгынан сыдьаайа, кэрэни, үтүөни тарҕата сылдьар буолуохтааҕын этэр.

Ольга Харайбатова, РФ уонна СӨ култууратын үтүөлээх үлэһитэ, "Музыка для всех" киин бырайыак салайааччыта: "Култуура үлэһитэ, биллэн турар, инники күөҥҥэ сылдьар. Кини киһи духуобунай баайын кэҥэтэр, хаҥатар. Онон култуура үлэһиттэригэр баҕарыам этэ төһө да ыарахан кэм буоллун сырдыгы, үчүгэйи тарҕатарга".

Амма улууһуттан сылдьар култуура, муусука кэрэ эйгэтигэр бэйэтин олоҕун анаабыт Василий Неустроев бу бэлиэ күҥҥэ эмиэ бу үрдүк ааты тутта. Уһун сыралаах үлэтэ сыаналаммытыгар олус диэн үөрэр, махтанар.

Василий Неустроев - Байаан Бааска, СӨ култууратын үтүөлээх үлэһитэ: "Биир идэлээхтэрбин итиитик-истиҥник эҕэрдэлиибин. Куруук үөрэ-көтө, ылыы-туойа, дьону үөрдэ-көтүтэ сылдьыҥ".

Күн бүгүн култуура кэрэ эйгэтигэр уон тыһыынчаттан тахса киһи үлэлиир. Саха сирин култуура уонна ускуустубатын үлэһиттэрэ саха норуодун култууратын, историятын киэн эйгэҕэ таһаараллар, тарҕаталлар. Кинилэр талааннара, айбыт үлэлэрэ аан дойду биһирэбилин куруук ылаллар.

Василий Слепцов, СӨ хотугу аҕыйах ахсааннаах норуттар тыйаатырдарын дириэктэрэ : "Култуура дьоно үрдүк таһымнаах буолуохтаахтар. Тоҕо диэтэр биһиги култуурабытын Арассыыйаҕа уонна аан дойдуга көрдөрөбүт".

Саха сиригэр кэнники сылларга "Култуура" национальнай бырайыак чэрчитинэн элбэх саҥа тутуу, саҥардыы үлэтэ ыытыллынна. Онтон быйылгыттан бүтүн дойду үрдүнэн Земский работник култууры диэн быраграмма олоххо киирээри турар.

Афанасий Ноев, : "Биһиги култуурабыт өссө тэтимнээхтик сайдан, билигин Арктика уонна олоҥхо киинэ арылыннаҕына бигиһи Арктика регионнарыгар саамай инновационнай сайдыылаах култуура кииннээх буолабыт".

Эпос уонна ускуустуба Арктикатааҕы киинэ бу сыл бүтүүтэ үлэҕэ киирэрэ былааннанар. Бу Уһук Илиҥҥэ эрэ буолбакка, бүтүн дойду үрдүнэн биир бөдөҥ култуура киинэ буолуоҕа.