Күндү түүлээҕи туттарыы сыаната быйыл хайдаҕый?

Анал станок сытыылананан, сыахха тириини ыраастааһын түбүгэ. Аан дойду үрдүнэн биир бастыҥ түүлээҕинэн биллэр киис тириитин ыраастааһын биир ордук быыччык үлэ. Манна сэрэнэн, ол эрэн түргэнник туттар-хаптар ирдэнэр. Петр Лаврентьевич Новогодин номнуо 30 тахса сыл бу идэҕэ бэриниилээхтик үлэлиир. Күндү түүлээх барыта кини илиитин нөҥүө ааһар.

Пётр Новогодин, "Сахабулт" тэрилтэ тириини таҥастыыр сыаҕын үлэһитэ: "Илитиллибитин кэннэ субатын сүллэрэбин. Бу дискэбэй станок, суба сүллэрэргэ аналлаах. Билигин киис тириитин ыраастыыбын. Уопсайынан бу станокка кырынаас тириититтэн саҕалаан эһэ тириитигэр тиийэ сүллэриэххэ сөп".

Субатын сүллэрии кэннэ түүлээҕи химическэй сурадаһыннаах ууга сытыараллар. Манна кииһи мунньан баран биирдэ угаллар. Ол эбэтэр, саамай аҕыйаабыта 150 устуука буолуохтаах. Билигин бу хочуолга таба тыһа имитиллэр.

Бу дубление диэн тириини таҥастааһын биир сүрүн ньымата. Хас биирдии тирии бу түһүмэҕи аастаҕына эрэ үчүгэйдик сымныыр, бөҕө уонна өр сылларга барар.

Айаал Сивцев, "Сахабулт" тэрилтэ тириини таҥастыыр сыаҕын салайааччыта: "Тыс буоллун, бөрө буоллун, киис, тииҥ да буоллун барыта химиянан таҥастанар. Хас биирдии кыыл тириитэ тус туһунан ньыманан имитиллэр”.

Онон хас биирдии түүлээҕи таҥастаһын тус-туһунан ньымалаах. Холобур, киис саамай өр таҥастанар, ортотунан 3 нэдиэлэ. Ол кэннэ эрэ биирдэ иистэнэр сыахха барар.

"Күндү түүлээх атыыга тасыар диэри уонча түһүмэҕи ааһар. Ол курдук сууйуллан, хатарыллан, химическэй таҥастааһыны ааспытын кэннэ тараанар, көп түүтэ ыраастанар", - Ирена Осипова, корреспондент.

Дьэ, ол кэннэ араас моһуоннаах таҥас-сап оҥоһуллан лааппыларга тахсар. Оттон билигин "Сахабулт" тэрилтэҕэ булчуттартан күндү түүлээҕи өссө да тута олороллор. Булчуттар ордук андаатары, кырсаны, саһылы, тииҥи уонна кииһи туттараллар эбит.

Дмитрий Винокуров, "Сахабулт" тэрилтэ түүлээҕи тутар салаатын сүрүн исписэлииһэ: "Ордук кырымахтаах уонна хара киис сыаналанар. Сырдык буоллаҕына төлөбүрэ кыра буолар. Саамай хара 7150 солкуобай буолар".

Билигин да киис биир бастыҥ күндү түүлээҕинэн биллэр. Онон сыаната да саамай үрдүк ортотунан 6-7 тыһ туталлар. Саһыл 600-2500 солкуобайга диэри, кырса 375-1500 диэри.