Хабылык уонна хаамыска өрөспүүбүлүкэтээҕи күрэҕэ оскуола оҕолорун түмтэ

Таатта улууһун Туора-Күөлүттэн сылдьар Мичийэ Хаптагаева быһаарыылаах киирсиитигэр киирээри, үөрүйэҕин чиҥэтэр. Кини олох оҕо эрдэҕиттэн төрүт спорт көрүҥүнэн  хабылыгынан, хаамысканан дьарыктанар. Онно кинини аҕата угуйбут. Билигин кини саамай сүрүн сыала – "Манчаары ооньуулара”.

Мичийэ Хаптагаева, күрэх кыттааччыта: "Хаамыска миэхэ олус туһалаах. Сылайдахпына оонньуубун, утуктаатахпына оонньуубун. “Манчаары оонньууларын” 5 кылаастан быһа эккиритиһэн, сыал-сорук туруорунан путевка былдьаһа сылдьабын".

2007-2017 сыллаах төрүөх оскуола оҕолоругар өрөспүүбүлүкэтээҕи күрэх "Модун" спорт уораҕайыгар ыытыллан саҕаланна. Быйыл тустаах күрэхтэһиигэ 16 улуус кыттыыны ылар. Мантан 16 кыыс уонна 16 уол "Манчаары оонньууларыгар" путевка хаһаайыттарынан буолуохтара.

"Тыҥааһыннаах киирсиилэр буола тураллар. Ол курдук алта остуолга тэҥинэн оонньуу барар. Хас биирдии күрэхтэһээччигэ судьуйалаах. Биирдии түһүмэх 2 мүнүүтэ салҕанар".

Кыттааччылар 5 бөлөххө хайдан, ол эбэтэр саастарынан арахсан оонньуулар. Судьуйа кэллиэгийэтэ биэлэтээн этэринэн, быйыл хаһааҥҥытааҕар даҕаны элбэх күрэхтэһээччи баар.

Иннокентий Максимов, күрэх кылаабынай судьуйата: "Бу күрэхтэһиигэ уопсайа 218 киһи кытта сылдьар. Олор истэригэр 6 спорт маастара баар. Итини сэргэ “Манчаары оонньууларыгар” сүүмэрдээһиҥҥэ сайаапкаламмыт 67 кыттааччы баар. Бу көрүҥ сайдан иһэрин көрдөрөр".

Тыҥааһыннаах киирсиилэргэ саамай долгуйбут дьон манна тренердэр буолаллар. Иитиллэччилэрин хас биирдии хамсаныытын болҕомтолоохтук көрөллөр-истэллэр.

Анастасия Винокурова, Нам улууһун сүүмэрдэммит хамаандатын салайааччыта: "Сылын аайы дьарыктанар оҕо элбээн иһэр. Ситиһии хайдах дьарыктаналларынан кэлэн иһэр".

Манна даҕатан эттэххэ, хабылык, хаамыска спорт көрүҥүн федерацията 2019 сыллаахха тэриллибитэ. Бу кэмтэн ыла үлэтин ыыра кэҥээн, бу спорт Саха сиригэр биллэ сайынна. Мантан сайын манчаарыга спортсменнар үчүгэй оонньууну көрдөрөллөрө саарбаҕа суох.