Саха сирин үүнээйилэриттэн косметика

Бу курдук анал лабораториҕа Саха сирин үүнээйилэриттэн косметика айыллан тахсар. Күннэй Тимофеева ыҥырыа иитиитинэн дьарыктаммыта бэһис сыла. Бу сыллар устата мүөттэн элбэх туһалаах бородууксуйаны оҥорон кэлбит. Өссө сайдан, саҥа сүүрэн киллэрэригэр, былырыыҥҥыттан дьүөгэтин кытта биир ситимнээхтик үлэлэһэн саҕалаабыт.

Күннэй Тимофеева, уурбаанньыт: «Арктическай инновационнай кииҥҥэ бииргэ үлэлээбиппит балтараа сыл буолла. Сыаналаах обруудабанньалары туһанан саҥа хайысхаҕа таҕыстыбыт».

Кинилэр Саха сиригэр үүнэр эмтээх оттон-мастан, ыҥырыа мүөтүттэн косметика айаллар. Бородууксуйаларыгар сэттэ көрүҥ от киирэр. Үүнээйилэрин саас, сайын эрдэ хомуйан хатараллар. Боҕуруоскай оттон саҕалаан, лабыктаҕа тиийэ хомуйаллар.

Күннэй Тимофеева, уурбаанньыт: «Куурбут ыҥырыаларбыт бу сыталлар. Итини сэргэ араас үүнээйилэрбит элбэх. Кыһыны быһа оҥорон таһаарыыга үлэлээбит буоламмыт өссө аҕыйаата».

Хас биирдии бородууксуйаны чинчийэн, ымпыгар-чымпыгар диэри үөрэтэн баран биирдэ таһаараллар. Холобур, бу сирэй крема айыллан тахсарыгар сыл аҥаара барбыт.

Марианна Соловьева, М.К. Аммосов аатынан ХИФУ доцена, биологическай билим кандидата: «Бородууксуйаларбыт барыта наукаҕа тирэҕирэллэр. Сирэй крема оҥорон таһаарарбытыгар бастаан эмтээх үүнээйилэри чинчийбиппит. Састаабын, ханнык кэмҥэ хомулларын, ханнык кэмҥэ туһалаах эттиктэрин туһаныахха сөбүн үөрэппиппит. Ол кэннэ косметикаҕа туһаныыны саҕалаабыппыт. Ол кэннэ бэйэбитигэр чопчу итэҕэйбиппитин кэннэ кыра ахсаанынан таһааран боруобалаабыппыт».

Биллэн турар, үрдүк көрдөрүүлээх, киһиэхэ туһалаах бородууксуйа оҥоһулларыгар элбэх түбүгү, сыралаах үлэни эрэйэр. Билигин дьүөгэлиилэр саҥа хайысхалары үөрэтэллэр, бородууксуйаларын кэҥэтэллэр.

Марианна Соловьева, М.К. Аммосов аатынан ХИФУ доцена, биологическай билим кандидата: «Күн уотуттан харыстыыр, иҥэмтиэлээх кремнэри ылсан эрэбит. Хас да саҥа көрүҥү айдыбыт. Сайын сибэккилэрбитин хомуйан баран дьэ күүскэ ылсыахпыт».

Маны таһынан ыҥырыаттан уонна мүөттэн эмтээх мазьтары оҥорон таһаараллар. Горнай уонна Чурапчы полугарный пасикалаахтар, онон быйыл өссө элбэх мүөдү ылан, бородууксуйаларын элбэтэр былааннаахтар.