Саас буолан бэйдиэ ыттары тутуу күүһүрэр

Юрий Никаноров 3 сылын ыты тутааччынан үлэлиир. Тустаах сулууспалара куорат уокуруктарын кытта дуогабардаһан күннэтэ бэйдиэ сылдьар ыттары тутуунан дьарыктанар. Тутар ньымалара араас, сүрүннээн астаах биэдэрэ, бэйэ оҥорбут хаайар тэрил, итиэннэ үрэр туруупка. Бу манан көҥүллээх ветеринарнай утутар препаратынан ыталлар. Сүрүннээн бу ньыма кырыктаах, туттарбат ыкка туһаныллар.

Саамай элбэх ыттаах сирдэринэн  Птицефабрика, ГРЭС, Сайсары, Строительнай уокуруктар буолаллар.

Юрий Никаноров, бэйдиэ ыттары кытта үлэлиир сулууспа дириэктэрин солбуйааччы: "Сайаапкалар диспетчерскэй сулууспаҕа уонна куйаар ситиминэн киирэллэр".

Бу киирбит сайаапкананан Птицефабрика оройуонугар ыты тутуу түгэнэ. Киһи ыллын да чэпчэкитик туппат үлэтэ. Өр эккирэтэһии кэннэ 2 ыт оҕотун ас биэрэн манньалаан  туттулар. Ийэлэрэ туттарбата. Сулууспа бу күҥҥэ номнуо 4-5 ыттара. Маннык үлэ күннэтэ салҕанан барар.

Сайсары уокурук салалтата олохтоохтортон киирбит сайаапкаларынан күннэтэ үлэлиир. Сыл саҕаланыаҕыттан оройуоннарыгар номнуо 55 бэйдиэ сылдьар ыты туппуттар. Бу ааспыт эрэ нэдиэлэҕэ 20 ыты тутан пууҥҥа ыыппыттар.

Олег Захаров, Сайсары уокурук салалтатын салайааччытын солбуйааччы: "Үлэ күүскэ бара турар. Сайаапка киирдэ да бэдэрээттээх тэрилтэҕэ тириэрдэбит. Кинилэр тута тахсаллар итиэннэ биһиэхэ оччуоттууллар. Тутуллубут ыттары дьиэ кыылын быстах кэмҥэ тутар пууҥҥа ыыталлар".

Уокурукка ыттары эрдэттэн  бэйэ оҥоһуу ловушкаҕа хаайан бэдэрээччиттэр кэлэллэригэр бэлэмнииллэр, ону тэҥэ саҥа технологияны эмиэ тутталлар.

Павел Тартакынов, Сайсары уокурук салалтатыгар ОДьКХ боппуруостарыгар сүрүн исписэлиис: "Маннык тутар тэриллэргэ мэҥиэ угабыт. Киирбиттэрин кэннэ кэлэн илдьэ бараллар. Эбии GPS трекердэр бааллар. Тыһы ыкка баайабыт уонна онон көрөн тутаттыыбыт". 

Куорат эргинээҕи бөһүөлэктэр эмиэ көхтөөхтүк үлэлэһэллэр. Ыты тутууга куорат иһигэр 3 биригээдэ үлэлэһэр.  Билигин саас бэйдиэ сылдьар ыты тутуу тэрээһинин күүһүрдэллэр. Ону тэҥэ, холбоһуктаах рейдэлэр бараллар. Өскөтүн бэйэҕит олорор сиргит эргин элбэх ыт сылдьарын көрдөххө, управаҕатыгар биитэр биир кэлим диспетчерскэй сулууспаҕа эрийэн сайаапка түһэрии ирдэнэр.