Иван Гоголев - Бурҕас "Тыа Сабарайдара" диэн саҥа кинигэтэ сүрэхтэннэ

Национальнай библиотека историческэй саалатыгар  дьиҥ-чахчы историяҕа  киирэр бэлиэ күн. Уус Алдантан сыдьааннаах Гоголевтар төрүттэрин кэпсиир саҥа  кинигэ сүрэхтэннэ. "Тыа Сабарайдара" кинигэҕэ  9 көлүөнэ дьоно-сэргэтэ тиһиллиннэ. Дьоһуннаах бэлэҕи киэҥ аймах тумус туттар киһитэ Иван Гоголев - Бурҕас оҥордо. 

Иван Гоголев – Бурҕас, "Тыа Сабарайдара" кинигэ ааптара. Уус Алдан улууһун бочуоттаах олохтооҕо: "Аныгы ыччаттар төрүттэрин билиэхтээхтэр. Хантан, кимтэн саҕаланан ийэ, аҕа ууһа буолан барбыттарын билэллэрин туһугар бу кинигэ сурулунна".

Суруллубут сыалын ситтэ диэн бигэтик этэр кыах баар.   Иван Васильевич хас да сыллаах үлэтин түмүгэ ордук ыччат аймахха  улаханнык биһирэннэ. Аймахтаһыы, хаан-уруу төрүттэри үөрэтии -  кинилэргэ хас эмэ бүк үөрүүлээх.

Ольга Громова, Саха сирин норуоттарын музыкатын уонна фольклорун түмэлин үөрэтэр-сырдатар салаатын сэбиэдиссэйэ: "Кэлэр кэнчээри ыччаттарбыт, оҕолорбут үөрэтэллэригэр, билсэллэригэр улахан төһүү күүс буолар дьоһуннаах кинигэ таҕыста диэн үөрэн-көтөн турабыт".

Дьиэ кэргэн сыаннастарын таһынан кинигэ өссө  историческэй уонна этнографическэй суолтата олус үрдүк. Тыл үөрэхтээхтэрэ бу кинигэни эмиэ туһаныахтарын сөп. 

Анатолий Гоголев, "Тыа Сабарайдара" кинигэ редактора: "Саха тылын үөрэтээччилэр эмиэ туһаныахтара. Тоҕо диэтэргин сүрдээх элбэх түөлбэ тылбытын, Мүрү эбэ тулатынааҕы тылы, кини тутунна".

Сабарай диэн урукку Уус Алдаҥҥа баар нэһилиэк аата. Билигин  каартаҕа суох. Ол эрэн кини аата кини сыдьааннарынан дорҕоонноохтук иккистээн ааттанна. 

Надежда Федотова-Гоголева, Уус Алдан улууһун олохтооҕо: "Олорон ааспыт дьоммут  сорохторун мөссүөнүн саҥа көрөбүт. Бу кинигэ биһиги аймахха остуолга ууруна сылдьан туһанар кинигэбит буолуо дии саныыбын".

Иван Гоголев – Бурҕас быраас идэлээх суруйааччы.  Доруобуйа харыстабылын эйгэтигэр 30-ча сыл үлэлээбитэ. Дьон доруобуйатын туһугар туруулаһар, үтүмэн үлэтин быыһыгар суруйбут 20-чэ кинигэлээх. Билигин кини 87-с хаарын санныгар уулларда.

Ольга Бурцева, Иван Гоголев-Бурҕас улахан кыыһа: "Аҕам Уус Алдан нэһилиэктэрин, сүрдээх элбэх тэрилтэ историятын үөрэттэ. Онон мин аҕабынан олус диэн киэн туттабын".

Ойуурдаах куобах охтубат, дьонноох киһи тутайбат. "Тыа Сабарайдара" кинигэ бу өс хоһоонугар дьүөрэлии. Үөрүүлээх тэрээһиҥҥэ улахан аймах ытык киһитэ утуму салҕыыр сорудаҕын  биэрдэ.

Иван Гоголев – Бурҕас, "Тыа Сабарайдара" кинигэр ааптара. Уус Алдан улууһун бочуоттаах олохтооҕо: "Аны сүүрбэччэ сылынан бу кинигэ салгыытын суруйуо этигит".

Дьиэ кэргэҥҥэ, уруу-аймах дьоҥҥо ытыктабыл, төрөөбүт дойдуга таптал. Бу олох сүрүн укулаата өйгө-санааҕа тыыннаах буоллаҕына, хас биирдии киһи олоҕо дьоллоох.