Агро хайысхалаах оскуолалар бастакы бэстибээллэрэ Дьокуускайга ыытыллар

Бастакы бэстибээл тута киэҥ далааһыннаахтык саҕаланна. Биир улахан саала тобус толору оскуолалар оҥорон таһаарыыларын быыстапкатынан туолла. Манна бэйэ оҥоһуу чэйтэн саҕалаан уустук технологиянан бэлэмнэнэр бородууксуларга тиийэ баар. Холобур, Хаҥалас улууһун Булгунньахтаах оскуолата хас да хайысханан дьарыктанар. Ол курдук уоҕурдуу оҥорор, оҕуруот аһын үүннэрэн араас бордууксуйаны бэлэмниир, ууга үүннэриллэр ньыманы баһылыыр. Дьаарбаҥкаҕа саҥа көрүҥнэри көрдөрүүгэ аҕалбыт. 

Галина Исакова, Булгунньахтаах агро оскуолатын производственнай үөрэхтээһин маастара: “Рассаданан эрэ буолбакка оҕолору чинчийэр үлэҕэ эмиэ үөрэтэбит. Калифорнийскай чиэрбэлэри ииппиппит  хас да сыл буолла. Маны оҕолор көрөллөр уонна атыылыллар”.  

Агро хайысхалаах оскуола биир сүрүн соруга - оҕону кыра эрдэхтэн сатабылга үөрэтии, бизнес эйгэтигэр сыһыарыы итиэннэ ону барытын науканы кытары ситимнээһин. Маныаха оскуола оҕолоругар устудьуоннар холобур буоллар. Агротехнологическай университет Өктөмнөөҕү салаата үөрэнээччилэргэ билим өттүнэн сүбэлэри биэрэр.

Варвара Афанасьева, АГАТУ Өктөмнөөҕү салаатын устудьуона: “Сайын өттүгэр уопут оҥоробут. Элбэх сыллаах оттору үүннэрэбит. Научнай чинчийэр конференцияларга кыттабыт. Оҕолору биһиги Өктөмнөөҕү салаабытыгар үөрэнэ кэлиҥ диэн ыҥырабын”.  

Оттон бэстибээл сүрүн соруга дойду үрдүнэн үлэлиир "Кадры в АПК" диэн федеральнай бырагыраама чэрчитинэн агро хайысхаҕа быыстала суох үөрэхтээһин ситимин көҕүлээһин. Онон тэрээһин кэмигэр үөрэнээччилэр үөрэх кыһаларын кытта ыкса билистилэр.

Валерий Федоров, АГАТУ ректора: “Агро хайысхалаах оскуолалары кытта тэҥҥэ үлэлэһэммит кэлин үөрэнээччилэр биһиэхэ үөрэххэ киирэннэр, идэ ыланнар тыа хаһаайыстыбатыгар үлэлииллэрин гына соруктаахпыт”.  

Маныаха үөрэнээччилэргэ анаан тыа хаһаайыстыбатыгар сайдыы тэтимин, оннооҕор роботторы туһаныы сотору кэминэн киириэҕин,  айти хайысханы туһаныы көдьүүһүн көрдөрдүлэр. Холобур, киһи илиинэн үлэтин аччатар саҥа кэм теплицаларын билиһиннэрдилэр.

Жараев Айаал, АГАТУ устудьуона: “Төлөпүөн сыһыарыытын нөҥүө үлэлиир, онон дьиэттэн олорон салайаҕын”.  

Икки күн устата ыытыллар бэстибээлгэ араас хабааннаах тэрээһиннэр ыытыллаллар. Ол курдук учууталлар таһымнарын үрдэтии куурустара, үөрэнээччилэргэ араас күрэхтэр, агро сокуолары сайыннарыы тула төгүрүк остуоллар ыытыллыахтара. Маннык бэстибээл инниктин сыл аайы тэриллиэ.