Саха циркэтэ "Дыырай Бэргэн уонна үс төбөлөөх Луо Балык" ураты туруорууну сүрэхтээтэ

Олоҥхоҕо кэпсэнэрин курдук Үөһээ, Орто уонна Аллараа дойдулар утары турсуулара бэрт интэриэһинэйдик ойууланар. Бухатыыр Дыырай Бэргэн кэргэнин Айталыын Куону уорбут абааһылар баһылыктарын Ардьамаан Дьардьамааны эккирэтэр уонна үс төбөлөөх биэс миэтэрэ уһуннаах Луо Балыгы кытары киирсии мүччүргэннээх сырыыта көстөр. Дыырай Бэргэн оруолун циркэ уопуттаах артыыһа Иннокентий Слепцов оонньуур. Кини циркэҕэ бары хайсханы ол курдук салгын гимнастикатын, джигитовканы, колесо смелости баһылаабыт артыыс.

Иннокентий Слепцов, Дыырай Бэргэн оруолун толорооччу: "Сөбүлүү көрөр кыыспын былдьатабын. Итиэннэ кинини быыһыы барабын. Онно саамай сүрүнэ артыыстар бэйэбит цирковой нүөмэрбит буолар". 

Дьүһүйүүгэ акробаттар, салгын гимнастара, канатынан хаамааччылар, жонглердар, дрессировкаламмыт кыыллар ураты нүөмэрдэри көрөөччүгэ бэлэхтээтилэр. Уонунан артыыс,олор истэригэр саамай эдэрдэрэ 7 саастаах  кыттааччы олонхо геройдарын оруолун толорор. Дыырай Бэргэн утарсааччытын Аллараа дойду абааһытын Ардьамаан Дьардьамааны циркэ артыыһа Николай Кузьмин толорор. Николай аан бастакытын омсолооох герой оруолугар холонор. Кини дьону үөрдэр, күллэрэр клоун үлэлээх артыыс.

Николай Кузьмин, Ардьамаан Дьардьамаан оруолун толорооччу: "Уобарас өттүнэн эттэххэ, абааһыны оонньуубун. Куһаҕан киһи эриллэҥнээн түһэн. Маннык оруолга бастакы холонуум буолар. Дьону үөрдэр киһи эмискэ дьону куттуохпун наада".  

Саха циркэтэ бу ураты туруоруутун сүрэхтэниитигэр көрөөччүлэрин күүтэр. "Дыырай Бэргэн уонна үс төбөлөөх Луо Балык" диэн биллиилээх олонхоһут Устин Нохсоров "Сыанаканан сыһыылаах, холуопканан хонуулаах, сылгы сүөһү оҕото Дыырай Бэргэн" айымньыгар олоҕуран суруллубут остуоруйа-туруоруу циркэ ураты нүөмэрдэрин кытта дьүөрэлиир. Айымньыны циркэ ааспыт сайын Амма улууһугар Олонхо ыһыаҕар көрдөрөн турар. Бу сырыыга туруоруу ситэн-хотон анаан-минээн артыыстарга көстүүмнэри, туһааннаах декорация бэлэмнээтилэр.

Сергей Расторгуев, СӨ государственнай циркэтин дириэктэрэ: "Былырыын Аммаҕа Олоҥхо ыһыаҕар үчүгэй баҕайытык көрдөрбүппүт. Дьон биһирэбилин бөҕө ылбыппыт. Онтон кынаттанан уонна  дьиҥэ билэр этибит циркэҕэ көрдөрүөхпүт диэн. Сүрдээх интэриэһинэй". 

Баай култуурабытын, талааннаах ыччаппытын кэрэһэлиир саҥа, сонун туруоруу  муус устар 27 күнүгэр диэри салҕаныаҕа. Бар дьону дьиэ кэргэнинэн кэлэн көрөргө ыҥыраллар.