Өрөспүүбүлүкэҕэ Сылгыһыт күнэ киэҥ далааһыннаахтык бэлиэтэннэ

Туораах бурдуктаах куулу көтөҕөн,салгыы буочукаҕа быраҕыы. Бу курдук 4 түһүмэхтээх сылгыһыт күрэҕин эстафетата ыытыллар. Бастакы түһүмэх 18 сааһын туола илик уол оҕо сылгыны көлүйэр тэриллэри сүүрэн илдьэр, ол кэннэ иккис кыттааччы сылгытын көлүйэн мэһэйдэри туораан үһүс киһиэхэ, ол эбэтэр бэтэрээн-сылыгыһыкка биэрэн, салгыы сыарҕанан көтүтүү буолар. Ол кэннэ  кууллаах бурдук түһүмэҕэ барар.

Бу курдук барыллаах өрөспүүбүлүкэҕэ Сылгыһыт күнэ Мэҥэ Хаҥаластар аатырбыт "Куоҥ харах" ипподромнарыгар ыытыллынна. Чугастан, ыраахтан дьөһөгөй оҕотун тутааччыллар бу күн манна тоҕуоруһа муһуннулар. Дьааҥы курдук ыраах сиртэн, сылгыларын тиэнэн халыҥ хамаанда кэлбит.

Кэскил Ефимова, Дьааҥы улууһун тыатын хаһаайыстыбатын салалтатын салайааччыта: "12 киһилээх делегация кэлэн турабыт. Онтон 4 киһи күрэххэ кыттар. Уолаттар сүргэлэрэ көтөҕүллэн сылдьар. Бэлэмнэнии баар. Нэдиэлэ иннинэ эрдэ кэлбиппит. Атыыга диэн соноҕостору аҕалан турабыт. Икки нэһилиэккэ сылгыны тэнитиинэн дьарыктанар хаһаайыстыбалаахпыт. Олор сылгылара бу дьаарбаҥкаҕа кэлэн тураллар".

Чахчы,  бу күн сылгы күрэҕин кытары атыы-тутуу ыытыллынна. Улуус улуус бэйэлэрин боруода сыспай сиэллээхтэрин аҕалыллар.

"Маныаха тэрээһиҥҥэ племенной сылгылар дьаарбаҥкалара турда. Ол курдук приленскэй боруодалар тураллар. Балар Хаҥалас уонна Өлүөхүмэ улууһуттар кэлбиттэр”.

Уопсайа бу тэрээһиҥҥэ 19 хамаанда кыттыыны ылла. Быйыл урукку сыллары кытары тэҥнээтэххэ, үгүс уларыйыылар киирбиттэр. Саамай сүрүнэ манна эдэр ыччаты көҕүлээһин буолар.

Иннокентий Семёнов, күрэҕи тэрийээччи: "Бастакы түһүмэххэ, атыы ыҥыырдааһыҥҥа, 18 диэри саастаах оҕону киллэрдибит. Ону улуустар бары үөрэ, сэргии ылыннылар. Бу эдэр ыччаппытын төрүт дьарыкпытыгар сыһыарыахтаахпыт диэн сыалтан-соруктан киирдэ".

Онон бу курдук  тыҥааһыннаах сүүрдүүнү Мэҥэ Ханалас улууһун олохтоохторо уонна ыалдьыттар  көрдүлэр. Хас да түһүмэҕи ситиһиилээхтик ааһан Амма улууһун Бөтүҥ 2 хамаандата бастакы миэстэни ылары ситистэ. Уонна 2,5 мөлүйүөн солкуобайы сууммалаах Тыа хаһаайыстыбатын министиэристибэтин сертификатын тутан, үөрэн-көтөн дьиэлээтэ.