Дьокуускайга "Муус Устар" ыччат бэстибээлэ түмүктэннэ

"Муус Устар" бэстибээл бу сыллар устата элбэх ыччаты уһуйда, саҥа ааттары, талааннары арыйда. Сылын аайы бэстибээл өрөспүүбүлүкэ бары улуустарыттан көхтөөх ыччаты биир сиргэ түмэр.

Бэстибээл түмүктүүр күнэ үгэс быһыытынан "Триумф" уораҕайыгар ыытыллынна. Манна  тэрийээччилэр элбэх интэриэһинэй бырагырааманы, көрсүһүүлэри бэлэмнээбиттэр, быыстапка тэрийбиттэр.

"Быйыл ыччат бэстибээлэ бэһис төгүлүн ыытыллар. Сылын аайы манна көрөөччүтэ, кыттааччыта элбээн иһэр. Манна быйыл өрөспүүбүлүкэ бары улуустарыттан ыччаттар 12 хайысханан үлэлээтилэр".

Трек элбээбитэ, оскуола оҕолоро, эдэр ыччат айар үлэҕэ уонна саҥа хайысхаларга интэриэстэрэ үрдээбитин көрдөрөр.

Уус Алдан улууһун хамаандата быйылгы ыытыллыбыт бэстибээлгэ эрдэттэн бэлэмнэммит , онон бары хайысхаҕа ситиһилээхтик кытынна.

Борис Лукачевскай, "Mуус устар" бэстибээл кыттааччыта: "Уопсай түмүгүнэн 6 этапка биһиги 1 миэстэни ылбыппыт. Ытыыга 1 миэстэни ылбыппыт, тургутууга 13 миэстэ буолбуппут, пилота суох көтөр аалларга 11 мисэтэ буоллубут. Онон финалга тахсар чиэстэммиппит".

Бэстибээл эдэр ыччакка айар үлэлэригэр саҥа сүүрээннэри, билсиилэри, дьоҕурдарын өссө сайыннаралларыгар кыах биэрэр.

Евгений Григорьев, Дьокуускай куорат баһылыга: "Эдэр ыччат тэтимэ олус түргэн. Ол иһин хас биирдии киһи бэйэтэ сатыырын үллэһиннэҕинэ, атын дьон тугу сатыырын көрдөҕүнэ сайдыыта түргэтээн биэрэр. Инньэ гынан маннык бэстибээл суолтата олус улахан. Манна кыайбыт бырайыактар олоххо киириилэригэр көмө ылаллар. Онон бырайыактара кынаттанар".

Онон маннык таһымнаах тэрээһиннэр саҥа ааттары таһаараллар, ыччат дьон бырайыактарын олоххо киллэрэллэригэр кыах биэрэр.