Дьокуускай күөллэригэр салгын киллэрэллэр

Хаһыытаан-ыһыытаан хамаандалар биирдиилээн мууһу буурдаан бараллар. Иван Борисов Хотугулуу-Илиҥҥи федеральнай университет тыыннаах эйгэ билимин институтун 4 кууруһун устудьуонун хамаандата иккиһинэн киирсэ сылдьар. Тустаах бөлөх бары уопуттаах кыттааччылар, онон бэйэлэрэ туспа тиэхиньикэлээхтэр.

Иван Борисов, ХИФУ тыыннаах эйгэ билимин институтун 4 кууруһун устудьуона: "Саас өттүгэр күөлү тэһээһин сүрүн сыала-соруга салгын киллэрээһин буолар".

Хамаандалар күрэххэ ох курдук оҥостон  кэлбиттэр. 7 туһааннаах үөрэх кыһаларын устудьуоннара 4 киһилээх бөлөҕүнэн күөн көрсөллөр. Күрэх бириэмэнэн ыытыллар, онон манна илии-атах күүһүн таһынан кытыгырас буолуохха наада.

"Хас биирдии хамаандаттан кэлэн ойбон тэһэллэр. Манна муус халыҥа 80 см. Бастакы хамаанда номнуо бүттэ, кинилэр бириэмэлэрэ 5 мүнүүтэ буолла".

Кыттааччылар ойбонтон уу тахсыар диэри буурдууллар. Уу таҕыстаҕына биирдэ муус тэһиннэ диэн ааҕыллар.  Маныаха кыттааччылар үгүстэрэ уопуттаах итиэннэ бары булка-алка сыстаҕас уолаттар буолан буурдууру үчүгэйдик сатыыллара көстөр. ХИФУ бастакы кууруһун устудьуона Алексей Колёмов былырыын аан бастакытын кыттарыгар буурдуурга үөрэммит.

Алексей Колёмов, ХИФУ тыыннаах эйгэ билимин институтун 1 кууруһун устудьуона: "Былырыын үчүчгэй уопуттаах уолаттар бааллар этэ. Онно мин бастакыбын кыттар этим. Билигин эмиэ бу кытта сылдьабын. Кыайыахпыт диэн эрэнэбин".

Тустаах тэрээһини сыллата Өлүөнэтээҕи уу эбийиэктэрин салалтата иилээн ыытар. Маныаха сыллата эдэр ыччаты айылҕаны, тыынар тыыннааҕы харыстыырга угуйар сыаллаах буолар.

Пётр Аргунов -  Өлүөнэтээҕи уу эбийиэктэрин салалтатын салайааччы: "Бу Аан дойдутааҕы уу күнүгэр анааммыт ыыттыбыт. Урут уруккуттан биһиги тэрилтэбит тэрийэн кэллэ. Ол курдук ХИФУ уонна АГАТУ устудьуоннарын икки ардыларыгар күрэх тэрийдибит".

Онон бу тэрээһин экологияҕа суолтата улахан. Кыһын устата тоҥон турбут сүүрүгэ суох уу эбийиэктэригэр сааһын хайаан да салгын киллэрэр наада. Тыынар тыыннаах өлөн сүппэтин туһугар итиэннэ уу сытыйбатын диэн.