Бааһырбыт байыастар атахтарыгар туралларыгар дойдуларын аһа күүс-сэниэ эбэр

Бу сип-сибиэһэй ынах этиттэн оҥоһуллубут фарш сотору кэминэн анал байыаннай дьайыыга бааһырбыт байыастарга тиийэ. Нам улууһа көмөҕө диэн 1,5 туонна эти биэрбититтэн "Түмэн" тыа хаһаайыстыбатын кооператива 250 киилэтин эрийэн, ыытарга сөптөөх гына бэлэмниир.

Ньургуйаана Вырдылина, технолог: "1 киилэнэн бэҕэһээ 53 сууну оҥорбуппут, бүгүн эмиэ 50 киилэни оҥорорбут буолуо". 

Улуустар хас да көрүҥ эти көмөҕө диэн ыыталлар. Ону волонтердар тэрилтэлэри кытта кэпсэтэн ыытарга сөптөөх гына оҥороллор. Холобур,  сылгы этиттэн бу курдук сиикэйдии хаппыт бородууксуйа оҥоһуллар. Салгын киирбэт гына сууланар буолан уонна харайыы болдьоҕо уһун буолан ыытарга олус табыгастаах. Онон бу көрүҥ аска биирдиилээн көмөлөһөөччүлэртэн да,  улуустартан да сакаас куруутун киирэр. Холобур, бу томполорго анаан оҥоһуллар. 

Том Макаров, "Түмэн" ТХК бэрэссэдээтэлэ: "Анал байыаннай дьайыы кыттыылаахтарыгар диэн сиикэйдии хатарыллыбыт эт сакааһа киирбитэ. Ону биһиги баар суох уолаттарбытыгар оҥорон ыытабыт". 

Анал байыаннай дьайыы кыттыылаахтарыгар ордук төрөөбүт дойдуларын күндү аһа күүс-сэниэ эбэр. Ыыһаммыт сылгы этэ, амтаннаах халбаһы курдук астар тиһигин быспакка бараллар. Оттон көмөнү барытын хомуйан, тэрийэн ыытыыны  уопсастыбаннай волонтердар иилииллэр-саҕалыыллар.

Светлана Диодорова – Лаврентьева, саллаат ийэтэ: "Бу эриллибит этэ бааһырбыт уолаттар баар куораттарыгар тиийиэҕэ. Онно волонтер эдьиийдэрбит ас арааһын астыыллар. Ол туһунан Саха сирин олохтоохторо бары билэллэр. Оттон бу биһиэхэ, төрөппүт дьоҥҥо, эмиэ туспа күүһү биэрэр. Дьоммут биһигини өйүүр буоллахтарына биһиги уолаттарбытыгар сырдык санааны ыытабыт".  

Көмөҕө биир да улуус туора турбат. Эт, балык, булт аһа тиһигин быспакка кэлэ турар. Оттон маны бэлэмнээһиҥҥэ Түмэн курдук тэрилтэлэр күүс-көмө буолаллар.

Евдокия Васильева, "Түмэн" ТХК сүрүн технолога: "Бэйэбит да өттүбүтүттэн көмөбүт элбэх дии саныыбын. Аҕыйах хонук иһигэр ити үлүгэрдээх элбэх оҕону түмэ тардан, түүннэри-күнүстэри да кинилэр сайаапкаларын толоро сатыыбыт". 

Биир дойдулаахтарбыт туһугар сомоҕолоһуу күүһэ үтүө саналаахтары түмэр.