"Сомоҕолоһуу күүһэ" диэн байыаннай-патриотическай күрэхтэһии ыытыллар

Дойдуга тапталы, бэриниилээх буолууну оҕоҕо, ыччакка иҥэрии, иитии үлэтэ Саха сиригэр көхтөөхтүк барар. Эдэр хорсун ыччаты түмэр байыаннай-патриотическэй күрэхтэһии, быйыл аан бастакытын ыытыллар. 

"Сомоҕолоһуу күүһэ”. Бу быйыл саҥа сүүрээн буолар. Манна өрөспүүбүлүкэ бары улуустарыттан 100 тахса кыттааччы күөн көрсө сылдьар", - Ирина Гольдерова, корреспондент.

Ол курдук кыттааччылар түөрт түһүмэҕи ааһыахтаахтар, онтон биир саамай сүрүн уонна уустук түһүмэҕинэн сэрии толоонугар суһал көмөнү оҥоруу күрэҕэ буолар. Манна кыттааччы хас биирдии хамсаныыта учуоттанар.

Александр Соров, "Воин" киин инструктора: "Хас биирдии хамсаныыны барытын эрдэттэн билэр, суоттуур ирдэнэр. Оччоҕо эрэ быыһыыбыт. Ыарахана диэн бэйэбит бэлэмнээбэтэх оҕолорбут".

Маны таһынан хамаандалар саанан ыытыыга, пилота суох көтөр ааллары көтүтүүгэ күрэхтэһиэхтэрэ. Хамаанда иһигэр алта киһи баар. Хас биирдии кыттааччы,  бэйэтин хайысхатыгар күүстээх, бэлэмнээх.

Дархан Афанасьев, М.К. Аммосов аатынан ХИФУ устудьуона: "Хамаандалар бары күүстээхтэр. Барыта 21 улуус кыттар. Ол иһин күрэхтэһии интэриэһинэйдик ааһыа дии саныыбын".

Бүлүү улууһун хамаандатыттан кыттар Сардаана Филиппова маннык күрэхтэргэ куруук кыттар. Кини өссө оскуолаҕа үөрэнэ сылдьан Юнармия хамсааһыныгар сылдьыбыт буолан, бу күрэххэ улахан ыараххаттары көрсүбэтэҕин этэр.

Сардаана Филиппова, Бүлүүтээҕи педагогическай колледж устудьуона: "Миэхэ чэпчэки диэххэ сөп. Историяны үчүгэйдик билии ирдэнэр эбит. Мин бэйэм уруккуттан кыттар буоламмын ыарырҕаппатым".

Күрэх "Муус Устар" ыччат бэстибээлин чэрчитинэн ыытыллар, онон кыттаачылары элбэх маастар-кылаастар, куонкурустар, көрсүһүүлэр күүтэллэр. Бэҕэһээ Арассыыйа Дьоруойдарын кытта көрсөн аһаҕастык кэпсэттилэр, сүбэ-ама ыллылар.

Игорь Соловьев, Үөһээ Бүлүү улууһун хамаандатын кыттыылааҕа: "Дьоруойдары билиэхтэрин наада, бу наҕараада хайдах ыараханнык кэлэрин билиэхтээхтэр".

Төрөөбүт дойдуга, норуокка тапталы үүнэр көлүөнэҕэ иҥэрии - дойду сүрүн соруга. Онон маннык күрэхтэри, тэрээһиннэри инниктин өссө кэҥэтэр, элбэтэр былааннаахтар.