Саас халтараан буолан дьон эчэйиитэ элбиир

Дьокуускайдааҕы травмпууҥҥа киирдин да эчэйбит киһи элбэҕэ көстөр. Саҥа оһолломмут кэлэр киһи ордук элбээн турар кэмэ. Бастаан травматолог быраас өлөрүүнү көрөн көмө оҥорор. Салгыы рентгеҥҥэ ыытан эчэйии туругун чопчулуур, ол кэннэ биирдэ эмтэниини аныыр. Халтараан буолуута саастаах дьоҥҥо ордук сэрэхтээх.

Роман Жирохов, травматолог быраас: "Ордук кырдьаҕас дьон эчэйэллэр. Кинилэр илиилэрин-атахтарын тоһуталлар. Оттон эдэр дьон сыырга, хаҥкылыы сылдьан,сноубордтуу сылдьан эчэйэллэр".

Төгүрүк суукка устата манна үлэ тохтообот. Хас сезон аайы саас-күһүн, сайынҥҥы да өттүгэр көрдөрүнээччи ахсаана элбиир.

Борис Иустинов, медбрат: "Күҥҥэ 100 тахса киһи көрдөрүнэ кэлэр. Саамай аҕыйаабыта 70 курдук буолара буолуо". 

Оттон өрөспүүбүлүкэтэҕи 1№-дээх балыыһа көрөр-диагностыыр салаатыгар араас эчэйиини ылбыт оҕолор кэлэллэр. Күҥҥэ ортотунан 70 тиийэ кыра да, оскуола да саастаах оҕолор эчэйэн көмө ыла кэлэллэр. Манна оҕо травмпуунугар амбулаторной көмө оҥороллор, онтон травматология уонна ортопедия салаатыгар сытан эрэн стационарга эмтэнэллэр.

Игорь Обутов, травматолог-ортопед быраас: “Оҕолор араас эчэйиини ылаллар, илии, атах, сис, төбө. Оттон төбө киэннэрэ нейрохирургия салаатыгар эмтэнэллэр. Онтон атыттар биһиги салаабытыгар сыталлар”.    

Мантан саас өссө халтараан буолара күүтүллэр. Онон хас биирдии киһи бэрт сэрэхтээх буолан, эчэйииттэн харыстаныан наада. Күн-дьыл сылыйан ириэрэн, онтон сарсыарда-киэһэ  өттүгэр тоҥорон суол-иис, тэрилтэлэр эргиччи сир барыта мууһунан бүрүллэн эрэр.

Сынньанар сирдэргэ хаҥкылыырга, сыыртан хатааһылыырга куттала суох буолуу быраабылатын билэр табыгастаах. Көннөрү уулуссаҕа да сылдьарга халтараан, онон сөптөөх атах таҥаһын кэтэр ордук. Охтуу кэннэ бэйэ эмтиэкэлэммэккэ, бириэмэни ыыппакка тута медицинскэй көмөнөн туһаныахха наада. Хойутаан көрдөрдөххө эчэйии иһэн эмтэниигэ эбии уустуктары үөскэтиэн сөп.