Ойуур баһаарыттан сэрэхтээх буолуу кэмигэр бэлэмнэнии тэтимнээхтик барар

Ойуур баһаара тахсыбытын туһунан иһитиннэрии киирээтин кытта, байыастар уоту умулларыыга түһүнэллэр. Тургутан көрүү буолан хас биирдии хамсаныы ирдэбил быһыытынан барар. Уопсайа 130 киһи кыттыыны ылар итиэннэ 30 тиэхиньикэ туһаныллар.

Онуоха диэри сиринэн умуруоруу бары сатабылларын көрдөрөллөр. Үөрэх кэмигэр дьиҥ буола турарга курдук түргэн-тарҕан туттуу ирдэнэр. Онон хас биир сөкүүндэни туһанан нэһилиэги уоттан быыһааһыҥҥа ууруллар.

"Үһүйээн быһыытынан баһаар Мэҥэ Хаҥалас улууһун Лоомтукатын сиригэр-уотугар турбут. Уот нэһилиэктэн чугас, онон ыксаллаах быһыы – майгы тириир. Балаһыанньа мүнүүтэ аайы кытаатар. Онон билигин салгынтан көмөнү күүтэллэр", - Мария Дмитриева, корреспондент.

Өр өтөр буолбат бөртөлүөт тиийэн кэлэр. Быыһааччылары тургутар сыалтан көтөр аал түһэр кыаҕа суох усулуобуйа диэн буолар. Онон көмөҕө кэлбит исписэлиистэр тута үрдүктэн анал быаннан түһэллэр.

Бу Арассыыйа үрдүнэн ыытыллар үөрэх иккис түһүмэҕэ.  Бары биэдэмистибэлэр көмөлөөн уоту төгүрүттүлэр. Итиэннэ нэһилиэнньэлээх пууҥҥа уот киирэрэ кутталын тохтоттулар.

Мичил Черноградский, "Якутслесресурс" Дьокуускайдааҕы салаатын баһаарынайа, биригэдьиир: "Күүстээх баһаар буоллаҕына итинник буолааччы, дьону быһыыллар хаайтаран хааллахтарына. Бүгүҥҥү үөрэхпит үчүгэйдик ааста".

Сааскы тургутан көрүүгэ байыастар бэлэмнэрин, сатабылларын көрүү таһынан тиэхиньикэ эмиэ сыаналанар. "Якутлесресурс" тэрилтэ быйыл уоту умуорууга туһаныллар көлөнөн хааччыллыбыт.

Василий Прудецкий - "Якутслесресурс" Дьокуускайдааҕы салаатын  дириэктэрэ: "Тиэхиньикэ национальнай бырайыагынан кэлэр. Ону таһынан бу быйыл “Сокол” диэн көлөнү бэрэбиэркэлиэхтээхпит".

Ойуур баһаарын умуруорууга быйыл уопсайа барыта 5,7 млд көрүлүннэ. Ааспыт сыллары кытта тэҥнээтэххэ икки төгүл кэриэтэ улахан. Бу байыас ахсаанын уонна саҥа салаалары арыйыыга туһуланыа. 

Григорий Колданов, РФ ыксаллаах быһыы-майгы министиэристибэтин Саха сиринээҕи салалтатын салайааччытын солбуйааччы: "Быйыл “Авиалесоохрана” састааба хаҥаата. Ол курдук икки саҥа салаа Ленскэй уонна Өлүөхүмэ улуустарыгар тэрилиннэ".

Быйылгы баһаартан сэрэхтээх буолуу кэмигэр бэлэмнэнии ааспыт сыл сэтинньитттэн бара турар.