Киин куоракка "Асчыт кистэлэҥэ" диэн эдэр ыччаттар күрэхтэрэ саҕаланна

Күрэхтэһии бириэмэтэ бэриллэн кыттааччылар астыырга түһүнэллэр. Дьоҕус куукуна тута минньигэс ас сытынан туолла. Тымныы оройо - Өймөкөөн улууһуттан сылдьар Нарыйаана Максимова саха дьоно сөбүлээн сиир убаһа этиттэн бүлүүдэни астыыр.

Нарыйаана Максимова, күрэх кыттыылааҕа: «Бастаан саарылыыбын, онтон луук, моркуоп кутабын уонна помидор, оҕурсу».

Кыттааччылар 3 чаас иһигэр 3 бүлүүдэни астыахтаахтар. Онон манна хас биирдии мүнүүтэ күндү. Сып-сап хамнанан, ол эрэн чопчу бириэмэни тутуһан үрдүк хаачыстыбалаах уонна биллэн турар минньигэс аһы астаан таһаарыахтаахтар. Маны барытын дьүүллүүр сүбэ сыаналыыр. 

Константин Матаннанов, "Тыгын Дархан" ресторан шеф-повара, күрэх дьүүллүүр хамыыһыйатын чилиэнэ: «Баалынан арахсар. Таҥаһын сабын көрөбүт, санитарнай быраабыланы тутуһар ду диэн. Туспа хоско олорон камеранан көрө олоробут уонна кэрийэ сылдьан эмиэ көрөбүт. Уонна подачата уонна бириэмэни сөпкө тутуһуу».

Онон эдэр асчыттарга эппиэтинэс улахан. Тэрээһин бастакы күнүгэр 4 киһилээх биир бөлөх күрэхтэһэр. Ыччаттар бары араас улуустан кэлбиттэр. Үгүстэрэ идэлээх асчыттар буолбатахтар. Ол эрэн, кыра саастарыттан бары астыылларын сөбүлүүр дьон мустубуттар. Кинилэр истэригэр  кулинарияҕа куйаар ситимигэр номнуо блог устан таһаарар ыччаттар бааллар.

Анита Иванова, күрэх кыттааччыта: «Боростой рецептэри таһаарабын, дьоннор сэргээтиннэр диэн. Убаһа уонна таба этэ, онно эҥин араас соустары эбэн диэбит курдук».

Оттон бу күрэх маннык иллэҥ кэмнэригэр ас астыыры сөбүлүүр дьарык оҥостор дьоҥҥо ыырдарын кэҥэтэргэ, сатабылларын өссө сайыннарарга кыах биэрэр. Сүрүннээн, саха төрүт аһын сөргүтүүгэ уонна саҥа тыыннаан киэҥ эйгэҕэ таһаарарга туһуланар. Маныаха күрэх аата кытта саха кухнятын аан дойдуга аатырдыбыт шеф-повар Иннокентий Иннокентьевич Тарбахов аатын сүгэр.

Светлана Александрова, күрэх тэрийээччитэ: «20-тэн тахса улуус сайаапкатын биэрэн бүгүн манна 11 кыттааччы-полуфиналистары көрсөн турабыт. Ол кэннэ 6 кыттааччы финалга киирсиэхтэрэ».

Оттон муҥутуур кыайыылаах Сахабыт сирин ордук биллэр рестораннарыгар стажировка ааһар кыаҕы ылыаҕа. Итиэннэ салгыы бу идэни баһылыырыгар күүс-көмө өйөбүл баар буолуоҕа.