Ыраас Арктика бырайыак саҥа сезона саҕаланна

Улахан кыамталаах тиэхиникэ хас эмит туоннанан тимир бөҕү металл тутар базаҕа сүөкүүр. Бу бөҕү ыраах тайаан сытар Усуйаана улууһуттан тиэйэн аҕаллылар. Александр Постников төһө да уопуттаах суоппар буоллар хас биирдии ыраах айаныгар эрдэттэн бэлэмнэнэр, эппиэтинэстээхтик сыһыаннаһар.  

Александр Постников, суоппар: «Суолбут зимник, суоппардар билэргит буолуо, киһи чэпчэки суола диэн ааттаабат. 2 нэдиэлэ курдук этэҥҥэ айаннаан кэллибит».

Усуйаана улууһун Сайылык бөһүөлэгиттэн барыта  60 туоннаттан тахса тимир бөҕү 3 массыына киин куоракка аҕалла. Тустаах улууска Ыраас Арктика бырайыагы Янолово хампаанньа иилиир. Сайын устата туһааннаах тэрилтэ, олохтоох дьаһалта үлэһиттэрэ итиэннэ көхтөөх ыччат  хомуллубут тимири бэлэмнииллэр, быһан-эрбээн массыынанан тиэйэргэ табыгастаах оҥороллор. Маныаха сайыҥҥы кэмҥэ суол-иис суох буолан саас суол турдаҕына биирдэ тиэйэллэр.

Александр Ларионов, "Янолово" тэрилтэ дириэктэрин солбуйааччы: «Бу металлоломмутун туттаран Благовещенскай собуотугар барыахтаах. Биһи бөһүөлэкпитин ыраастаан, эһиил тимир мунньустубут сирин тупсаран спортивнай былаһаакка тутуохтаахпыт».

Ыраас Арктика федеральнай бырайыак 5 сыллааҕыта саҕаламмыта. Саха сиригэр аан бастаан Булуҥ улууһун Тикси бөһүөлэгин тимир бөхтөн ыраастаабыттара. Бастакы сыл Тикси муора пуордуттан 300 туонна металлолому хомуйан баржаларынан тиэйэн илдьибиттэрэ. Оттон 5 сыл иһигэр номнуо хас да Арктика улууһугар 800 тахса туонна тимир бөх хомуллубута.

Сергей Неустроев, СӨ хотугу норуоттар дьыалаларын уонна Арктика сайдыытын миниистирин бастакы солбуйааччыта: «Муора таһыгар сытар улуустарга үлэ бара турар. Сыл аайы улуустар эбиллэ тураллар. Бүгүн эдэр ыччаты мунньаммыт кинилэргэ үлэни кэпсээммит бэйэбит эйгэбитигэр тардабыт».

5 сыл иһигэр бырайыак үтүө түмүктээҕин көрдөрдө. Маныаха быйыл саҥа хайысха эбилиннэ. Ол курдук, улуу кыайыы 80 сылынан сиэттэрэн аҕа дойду сэриитин кэмигэр буолбут кыргыһыылар сирдэрин эмиэ ыраастыахтара.