Дьокуускай куоракка "Муус Устар" ыччат фестиваля саҕаланна

Быйыл "Муус Устар" фестиваль үбүлүөйдээх сыла. Бэстибээл бу сыллар устата элбэх ыччаты уһуйда, саҥа ааттары, талааннары арыйда. Быйыл бэстибээл былырыыҥҥыттааҕар өссө элбэх кыттааччыны түмтэ. Манна ырааҕы ахсарбакка Арктика уонна Хоту улуустан тиийэ кэллилэр.

Бу күннэр устата эдэр ыччат 12 хайысханан кыттан бэйэтин кыаҕын көрдөрүөҕэ. Бастакы күннэ сарсыардаттан саҕалаан үлэ хас да былассаакканан барда. Муус Устар бэстибээл саҕаланыаҕыттан ыытыллар Хомус тэтимэ куонкуруска быйыл хаһааҥҥытааҕар да элбэх кыттааччы кэлбит.

Туйаара Жиркова, "Хомус тэтимэ" куонкурус тэрийээччитэ: «Кыттааччылар интириэстэрэ сылын аайы улаатан иһэр. Быйыл 46 кыттааччы. Инники сыллардааҕар элбэх көрдөрүү. Нижний Новгородтан кытары сайаапка кэлбитэ. Кэтэхтэн көрүү кэннэ 10 финалга тахсыбыт кыттааччыларбытын бүгүн көрөөрү сылдьабыт».

Амма улууһуттан сылдьар Егор Никифоров Муус Устар фестивальга аан бастакытынан  кыттар. Бэстибээлгэ анаан-минээн эрдэттэн бэлэмнэнэн кэлбит. Олус диэн долгутулаах уонна эппиэтинэстээх диэн этэр.

Егор Никифоров, "Муус Устар-2025" бэстибээл кыттааччыта: «Хомуһунан дьарыктаммытым номнуо уонтан тахса сыл буолбута буолуо. Толорор айымньым финал кэмигэр диджей муусукатын кытта импровизация буолар».

Быйыл кыттааччыларга архитектура хайысхата саҥа сүүрээн буолар. 30 кыттааччы хамаанданан арахсан үс күн устата бэйэлэрин бырайыактарын оҥорон, көмүскүөхтэрэ. Сунтаар улууһуттан сылдьар Игорь Петров хамаандатыгар төрдүөлэр. Ыччат дьон бырайыактарын олоххо киллэрэллэригэр кыах биэрэр диэн этэр.

Игорь Петров, "Муус Устар-2025" бэстибээл кыттааччыта: «Кейс с проектной деятельностью биэрбиттэрэ. Ону биһи бырайыакпытыгар киллэриэхтээхпит, саҥардан биэрэбит. Бу бэстибээл эдэр ыччакка да буолбакка өрөспүүбүлүкэбит куораттарыгар, улуустарыгар тоҕоос буолуо».

Бэстибээл тэрийээччилэрэ элбэх интэриэһинэй бырагырааманы, көрсүһүүлэри бэлэмнээтилэр. Бэстибээлгэ Арассыыйа Дьоруоуйдара, ааттаах суоллаах, биллэр-көстөр спортсменнар, артыыстар ыалдьыттыахтара. Кыттааччылары кытта илэ көрсөн, кэпсэтэн, сүбэ-ама биэриэхтэрэ. Түмүктүүр тэрээһин кулун тутар 22 күнүгэр Триумф уораҕайыгар ыытыллыаҕа.