Бу күннэргэ сөҥүүлээх сылаас күнү-дьылы билгэлииллэр

Губинскай уокурук биир саамай уопуттаах тутаах үлэһитэ Яков Аринкин оҕо былассааккатын хаартан ыраастыыр түбүккэ сылдьар. Хас даҕаны буолан дөйө тоҥмут муустаах хаары сиртэн хоҥуннаран былаһаакка тас өттүгэр биир сиргэ мунньаллар. Яков Егорович дворнигынан үлэлээбитэ 20-тэн тахса сыл буолла. Куйааска да тымныыга да, сиппиир, лаппаакы тутуурдаах туруу үлэһит олорор куораппыт ыраас, бэрээдэктээх буоларыгар күннэтэ туруулаһар.

Яков Аринкин, Губинскай уокурук муниципальнай дворнига: «Саамай үлэтэ – күһүн, саас буоллаҕа. Куораппыт ырааһырарыгар мөхсөбүт».

Мунициальнай дворниктар маннык хас биирдии олорор дьиэлэргэ баар оҕо былассаакаларын хаартан, муустан ыраастаан саҕалаатылар. Афанасий Тарабукин тиэргэн ыраастааччынан үлэлээбитэ эмиэ быданнаата. Быйыл хаар орто диэн сыаналыыр. Күннэтэ хаары кытта охсуһар биллэн турар уустук үлэ.

Афанасий Тарабукин, Губинскай уокурук муниципальнай дворнига: «Бу бэһис былаһааккабыт. Сарсыарда 9-тан киэһээҥҥэ дылы».

Бу кэмҥэ санитанай ырааһырдыы чэрчитинэн, дьиэлэр, тэрилтэлэр территорияларын хаартан, муустан, улахан габариттаах бөхтөн хомуйуу үлэтэ күүһүрэр.

Халлаан сылыйан оҕо-аймах таһырдьа тардыһар.Билигин киин куоракка сыырдыыр комплекстар, сынньанар сирдэр элбэхтэр, биирдилээн даҕаны общественнай сирдэргэ муус сыырдарга элбэх оҕо көхтөөхтүк мустар, хаҥкынан хатааһылыыр. Маныаха сырылыырга, көннөрү уулуссаҕа даҕаны сэрэхтээх буолуу ирдэнэр.

Бу өрөбүл күннэргэ арҕааттаан киирбит сис былыттан сылтаан Саха сирин арҕаа өттүгэр элбэх сөҥүү түһэн биллэ сылыйда. Бэл хоту Өлөөн улууһугар плюс биир кыраадыска диэри ичигэс буолла.

Саргылаана Никитина, Дьокуускайдааҕы күнү-дьылы кэтээн көрөр  сулууспа күн-дьыл туругун сылыктыыр салаатын салайааччыта: «Салгын температурата түүнүн -17-22, хотугулуу-илин -30-35, Өймөкөөҥҥө -40-45. Күнүскү температура -7-12, хотугулуу-арҕаа -4-9, арҕаа +1+6 кыраадыс».

Бу нэдиэлэҕэ эмиэ арҕааҥҥы циклоннар киирэн тыаллаах, хаардаах сылаас күн-дьыл турара күүтүллэр. Дьокуускайга күнүһүн минус алта кыраадыска тиийэ сылыйыаҕа.