Саха сиригэр урутаан сайдыыга 76 резидиэн баар

Иннокентий Колодезников Саха сирин күндү тааһын кырылаабыта 20-тэн тахса сыл буолла. Былырыын саҥа тэриллибит хампаанньаҕа маастарынан ыҥырбыттарыгар тутатына сүбэлэспит. Кини хас биирди күндү таас кырылыырга уратылаах, ньыымалардаах диэн этэр.

Иннокентий Колодезников, "Дойдум тааһа" тэрилтэ маастара: «Туох баар күндү тааһы барытын огранкалыыбыт. Саамай хаппырыыс бу хромдиопсид».

"Дойдум тааһа" тэрилтэҕэ төрдүө буолан үлэлииллэр. Саҥа сүүрээни киллэрэн, Саха сирэ уруутан сайдар территория хамаандатыгар киирэн үлэ-хамнас үөһүгэр сылдьаллар. Улуу Эбэ тааһыттан сахалыы харысхал, киэргэл оҥороллор. Судаарыстыбаттан көмө, субсидия ылан, билигин ТОР биир бастыҥ резидиэннэрэ.

Григорий Каратаев "Дойдум тааһа" тэрилтэ салайааччыта: «Алмаас саамай кытаанах таас. Ону билэр буоламмыт атын да тааһы оҥоруохха сөп диэммит. Былырыыҥҥаттан атын тааһы барытын оҥорор буоллубут. Бу шарик оҥорорго бу станогу барытыны ааһар, сороҕун илиибитинэн оҥоробут. Барытын эргийэн кэлэн маннык бородууксуйа буолан тахсар».

Урутаан сайдыы кииннэ уопсайа 76 резидиэн ол иһигэр 13 саҥа киирбит саҕалааччылар бааллар. Сылын аайы саҥа көрүүлээх, сүүрээннээх резидент эбиллэн иһэр. Өрөспүүбүлүкэҕэ эрэ буолбакка, Арассыыйа, Аан дойду таһымыгар тиийэ биллэллэр.

Дьулустаан Тобун, "ФокусПро" киин салайааччыта: «ТОР “Якутия” киирэммит күүстээх көмө буолла. Мантан саҕалаан Арассыыйа, Казахстан таһымыгар тахсарбытыгар улахан төһүө буолла».

Биир бастыҥ ТОР резиденэ Экопласт тэрилтэ 2016 сыллаахтан ситиһилээхтик үлэлии турар. Күн бүгүн тэрилтэҕэ 25 киһи үлэлии-хамсыы сылдьар.

Айаан Уваров, "Экопласт" тэрилтэ дириэктэрин эбээһинэһин толорооччу: «Полиэтилен матырыйаалтан ууга уонна гааска туттуллары таһаарабыт. Сылга 400-500 туонна курдук оҥоробут».

Саха сиригэр сайдыы тэтимнээхтик барар сирэ тэриллиэҕиттэн 134 миллиардтан тахса инвестиция киирдэ, 10 тыһыынчаттан тахса үлэ миэстэтэ тэрилиннэ. Өрөспүүбүлүкэ социальнай-экономическай сайдыытыгар төһүү буолуохтаах тэрилтэлэр атахтарыгар туралларыгар бу бырайыак иһинэн сири биэриигэ, инфраструктуранан хааччыйыыга, нолуокка араас чэпчэтиилэр көрүллэллэр.