Сахалар тыылга: билигин 104 саастаах Татьяна Сафонова тыылга тырахтарыыстаабыта

104 хаарын уулларан эрэр ытык кырдьаҕас улуу Кыайыы 80 сыллаах үбүлүөйүн күүтэр. Үлэ, тыыл бэтэрээнэ Татьяна Семеновна Сафонова өрөспүүбүлүкэбитигэр уһун үйэлээхтэртэн биирдэстэрэ. Кини икки кыыс оҕолоох, 9 сиэннээх, 20 хос сиэннээх уонна 14 хос хос сиэннээх. Татьяна Семеновна билигин киин куоракка улахан сиэнигэр олорор. Ытык кырдьаҕас үйэттэн ордук сааһыгар чөл өйүгэр сылдьар,ол эрэн кэнники инсуллаан саҥарара мөлтөөбүт. Улахан сиэн кыргыттара эбээлэрин туһунан бэрт сэргэхтик кэпсииллэр.

Лена Кириллина, Татьяна Сафонова сиэнэ: “Тоҕус сиэн бары оскуолаҕа үөрэнэ сылдьан сынньалаҥ буолла эрэ эбээбитигэр Дабааҥҥа барабыт. Онно бары сайыны быһа сылдьабыт, бэйэтэ үлэ лааҕыра. Сүөһүлээхтэр, эбээ 50 кууруссалаах этэ уонна олус улахан буолалаахтар. Аҥаардас хортуоска сиэмэтэ 80 куул, ону санааҥ кэбиһиҥ. Ону барытын сыыс оттуубут, тээпкэлиибит”.

Үлэһит киһини үлэ батыһа сылдьар дииллэр. Татьяна Семеновна сэрии саҕана 20-лээх кыыс  тырахтарыыс идэтин баһылаан тыылга тракториһынан, онтон биригэдьииринэн үлэлиир. Сэрии бүппүтүн кэннэ 1946 сыллаахха сэрии толоонуттан төннүбүт Иннокентий Иванович Хохоловка кэргэн тахсан төрөөбүт дойдутугар Дабааҥҥа көһөн тиийэн колхуоска, онтон оҕо уһуйааныгар, салгыы сопхуоска барытыгар салайар үлэҕэ сылдьар. Дьэ онтон 1979 сылтан бочуоттаах сынньалаҥҥа барар. Ол эрэн, дьиэ-уот, хаһаайыстыба үлэтэ бүппэтэҕэ. 100 сааһын ааһан да баран бу ыалдьыан эрэ иннинэ дьиэ ис-тас үлэтин син-биир оҥоро сылдьыбыт.

Татьяна Аржакова, Татьяна Сафонова улахан сиэнэ: “Сарсыарда эрдэ туран бэйэтэ суунар-тараанар, сарсыардааҥҥытын аһыыр, онтон манна кэлэн телевизор холбуур. Эбиэт кэннэ сынньалаҥ кэмнээх. Нэдиэлэни быһа “Поле чудес”  биэриини кэтэһэбит”.

104 саастаах ытык кырдьаҕаһы биһиги устар бөлөхпүт телевидение архыыбыгар үйэлэргэ киллэрдэ. Оттон хос хос сиэнэ кини туһунан сиһилии иһитиннэриини саҥа үлэлээн саҕалаабыт сайтка суруйан үйэтиттэ. Даҕатан эттэххэ,  Аҕа дойду сэриитин сылларыгар тыылга үлэлээбит, фроҥҥа көмө буолбут дьон итиэннэ тэрилтэлэр ааттара биир сиргэ түмүллэн бу сайтка киирдэ. Манна хас биирдии куорат олохтооҕо тыылга үлэлээбит чугас дьонун туһунан иһитиннэриини киллэрэн кинилэр ааттарын үйэтитэр кыахтаах.