Саас халтараан буолан, оҕо эчэйиитэ элбиир

Саас сылыйан оҕо-аймах таһырдьа тардыһар.Билигин киин куоракка сыырдыыр комплекстар, сынньанар сирдэр элбэхтэр, биирдилээн даҕаны уопсастыбаннай сирдэргэ муус сыырдарга элбэх оҕо көхтөөхтүк мустар, хаҥкынан хатааһылыыр. Маныаха сырылыырга, көннөрү уулуссаҕа даҕаны сэрэхтээх буолуу ирдэнэр.

Өрөспүүбүлүкэтээҕи 1 №-дээх балыыһа көрөр-диагностыыр салаатыгар араас эчэйиини ылбыт оҕолор кэлэллэр. Төгүрүк суукка устата манна үлэ тохтообот. Күҥҥэ ортотунан сэттэ уончаҕа тиийэ кыра да, оскуола да саастаах оҕолор эчэйэн көмө ыла кэлэллэр. Хас сезон аайы саас-күһүн, сайынҥҥы да өттүгэр көрдөрүнээччи ахсаана элбиир.

Валентина Дьячковская, СӨ 1№-дээх балыыһатын көрөр-диагностыыр салаатын сэбиэдиссэйэ: “Эчэйиилээх оҕолор биһиэхэ дьиэттэн да кэлэллэр, уулуссаттан да кэлэллэр. Дьиэҕэ охтооччулар сүрүннээн оронтон, остуолтан сууллаллар. Ити төрөппүт көрүүтүттэн тутулуктаах. Ону таһынан  күрэхтэһиилэртэн спортивнай эчэйиилээхтэр кэлиэхтэрин сөп”. 

Манна травпууҥҥа тута исписэлиис көрөн быһааран эмтэниини аныыр. Тостууларга рентген, тустаах аппараакка түһэрэн чопчу диагноз туруораллар. Манна амбулаторной көмө оҥороллор, онтон травматология уонна ортопедия салаатыгар сытан эрэ эмтэнэллэр. Сылга ортотунан эчэйилээх 1700-тэн тахса оҕо отделенияҕа сытан ааһар, эпэрээссийэ оҥоһуллар.

Игорь Обутов, травматолог-ортопед быраас: “Оҕолор араас эчэйиини ылаллар, илии, атах, сис, төбө. Оттон төбө киэннэрэ нейрохирургия салаатыгар эмтэнэллэр. Онтон атыттар биһиги салаабытыгар сыталлар”.  

Оҕо киинин  травматологияҕа уонна ортопедияҕа салаата 40 куойка-миэстэлээх. 9 быраас ыарыһахтары көрөр-истэр. Сыл устата стационар толору буолар. Манна аҥаардас эчэйиини эрэ буолбакка, уҥуох, былчыҥ ыарыылаахтары кытта эмтииллэр. Холобур, инбэлииттээх оҕолор улуустартан ананан кэлэн былаанынан сылга иккитэ киирэн сыталлар. 

Григорий Комиссаров, травматолог-ортопед быраас: “Бу салааҕа оһолломмут оҕолор киирэн эмтэнэллэр. Ол эбэтэр эпэрээссийэлэрэ, балыыһаҕа сытан эмтэниилэрэ манна барар. Ону таһынан уҥуох, былчыҥ ыарыылаах оҕолор киирэллэр. Уопсайа 40 куойкалаахпыт, өрөспүүбүлүкэни барытын хааччыйабыт”.  

Мантан кэнники өссө халтараан буолара күүтүллэр. Онон хас биирдии киһи бэрт сэрэхтээх буолан, эчэйииттэн харыстаныан наада. Охтуу кэннэ бэйэ эмтиэкэлэммэккэ, бириэмэни ыыппакка тута быраас  көмөтүн туһаныахха наада.