Мас дьиэ тутуутугар анал исписэлиистэри бэлэмнээһин барар

"Быйыл өрөспүүбүлүкэҕэ уопсайа барыта 690 тыһыынча кыбадыраатынай миэтэрэ олорор дьиэ туттуллуоҕа. Ону таһынан 41 социальнай эбийиэк үлэҕэ киириэҕэ. Бу сылга “Звезднай” түөлбэҕэ оскуола, поликлиника уонна оҕо уһуйаана арыллыахтара".

Кэнники сылларга хаһааҥҥытааҕар да элбэх тутуу барар. Ол курдук ааспыт сылга муҥутуур көрдөрүүнү куоһарбыппыт. 750 тыһыынча кыбадыраатынай миэтэрэ тутуллубута. Мантан улахан аҥаара 420 тыһыынчата чааһынай дьиэ. Бу мас дьиэ тутуута тэтимнээхтик сайдыытын көрдөрөр.

Маныаха тустаах исписэлиистэр тиийбэттэрэ тирээн, 3 сыллааҕыта Инженернэй факультекка мас дьиэ тутуутун хайысхата арыллыбыта. Онон бу бастакы үөрэхтээх маһынан уһанар тутааччылар буолуохтаах устудьуоннар. Манна Саха сирин уратытын учуоттаан туран табыгастаах дьиэни тутуу технологията ымпыктаан-чымпыктаан үөрэтиллэр.

Артур Габышев, ХИФУ инженернэй факультетын мас дьиэни тутуу лабораториятын сэбиэдиссэйэ: «Тэрилтэлэр Тутуу министиэристибэтигэр, биһиэхэ туруорсууларын түмүгэр биһиги арыллыбыппыт. Кинилэргэ билигин каадыр тиийбэтэ сытыытык турар, үлэһиттэр тиийбэттэр. Хас биирдии киһи бэйэтин хайысхатын өйдөөн, холобур, бу мин бырайыак оҥорооччу, смета таҥааччы буолуохтаахпын диэн билэн тураннар, болҕомто уураннар үөрэнэллэригэр сыаллаах-соруктаах биһиги  кафедрабыт үлэлиир».

Тутуу ньымаларын сэргэ устудьуоннар маһы таҥастааһыны, туругун чинчийэллэр. Холобур, бу тутуу матырыйаала төһө кээһэниилээҕин кээмэйдииллэр. Улаханнык ирдэниллэр салааҕа үөрэнэр буоланнар, номнуо бүтэрдэхтэринэ үлэлиир сирдэрин  дуогабардаһан сылдьаллар. Онон сотору кэминэн мас дьиэ тутуута саҥа үктэлгэ тахсыа.

Саҥардыллыбыт дьиэ тутар кэмбинээт иккис тыыннанан  үлэлээбитэ нэдиэлэттэн орто. Хас да сыл тохтуу сылдьыбыт собуокка билигин үлэ ньиргийэн олорор. Оҥорон таһаарыы кээмэйэ балысхан, онон тэтим күүстээх.

Андрей Сторожев, "РИА - Строй" хампаанньа сүрүн технолога: «Оҥорон таһаарар кээмэйбит улаатыахтаах. Билигин бастакы уораппыт диэн 35 тыһыынча кыбадыраатынай миэтэрэҕэ диэн. Оттон иккис уочараппыт эбилиннэҕинэ өссө улаатан, кэҥээн киирэн барыахтаахпыт».  

Барыллаан аҕыынан кэмбинээт күүскэ үлэлээһинин түмүгэр тутуллар дьиэ кыбадыраатынанй миэтэрэтин сыанатын 15% кыччатар сорук турар. Оттон тутууну саҥа таһымҥа таһаарыыга бары усулуобуйа олохтонор.