Саха Сиригэр "Муус устар" ыччат бэстибээлэ кэлэр нэдиэлэттэн саҕаланыаҕа

Муус устар ыччат бэстибээлэ быйыл бэһис сылын ыытыллар. Сылын аайы бэстибээл Өрөспүүбүлүкэ бары улуустарыттан талааннаах, көхтөөх эдэр ыччаты биир сиргэ түмэр. Бэстибээл ыччаты уһуйар, саҥа ааттары, талааннары арыйар, билиилэрин ханатар соруктаах. Эдэр ыччат 12 хайысханан кыттан бэйэтин кыаҕын көрдөрүөҕэ.

Горнай улууһун хамаандата былырыын Муус устар бэстибээлгэ бастыыр чиэскэ тиксибитэ. Быйыл да кыайыыга эрэллээхтэр. Хамаанда бары хайысхаҕа бэлэм - 65 буолан кэлбиттэр. 

Сардаана Стручкова, Горнай улууһун баһылыгын эбээһинэһин толорооччу: «Бэлэммит күүстээх. Муниципальнай этапка 340 киһи кыттан, быйылгы күрэхтэһиигэ 65 ыччаты илдьэ кэллибит. Куһаҕана суохтук кыкттыахпыт диэн эрэнэбит. 3 иһигэр киирбит диэн баҕа санаалаахпыт».

Бэстибээл тэрийээччилэрэ элбэх интэриэһинэй быраграаманы, көрсүһүүлэри бэлэмнээтилэр. Бэстибээлгэ Арассыыйа Дьоруоуйдара, ааттаах суоллаах, биллэр-көстөр спортсменнар, артыыстар ыалдьыттыахтара. Кыттааччылары кытта илэ көрсөн, кэпсэтэн, сүбэ-ама биэриэхтэрэ.

Быйыл бэстибээл үбүлүөйдээх сыла, онон былырыыҥҥыттааҕар өссө элбэх кыттааччыны күүтэр. Манна ырааҕы ахсарбакка Арктика уонна Хоту улуустан тиийэ кэллилэр.

Людмила Мырсанова, Булуҥ улууһун дьаһалтатын ыччат дьыалаларыгар уонна социальнай коммуникацияҕа салайааччы: «У нас в республике очень много талантливой молодежи. Особенно сейчас – в век цифровизации, искусственного интеллекта. Это очень хорошая площадка для детей, школьников и студентов, которые ищут себя в чем-то и могут себя проявить и задействовать это в дальнейшей жизни».

Чурапчы улууһун хамаандата быйылгы ыытыллар бэстибээлгэ анаан-минээн эрдэттэн бэлэмнэммиттэр. Бэстибээл эдэр ыччакка айар үлэтигэр саҥа сүүрээннэри, билсиилэри, дьоҕурдарын өссө сайыннаралларыгар кыах биэрэр диэн этэллэр. 

Алёна Пермякова, Чурапчы улууһун дьаһалтатын ыччат дьыалаларыгар уонна социальнай коммуникацияҕа салайааччы: «Талааннаах ыччат бэйэтин сайыннарарыгар, бэйэтин олоххо буларыгар сүрдээх улахан трамплин. Тоҕо диэтэргэ, биһиги быйылгы кыайыылаахпыт Күннэй Тимофеева билигин өрөспүүбүлүкэҕэ биллэр тигээйи иитэччитинэн билиннэ».

Маннык таһымнаах тэрээһиннэр саҥа ааттары таһаараллар, ыччат дьон бырайыактарын олоххо киллэрэллэригэр кыах биэрэр. Бэстибээл кулун тутар 17-22 күнүгэр диэри ыытыллыаҕа.