Сааскы халаан утутугар уонна баһаартан сэрэхтээх кэмҥэ бэлэмнэнии саҕаланна

Ааспыт сыл халаан уута Саха сиригэр улахан алдьатыылаах кэлэн барбыта. Ол курдук Нам улууһун үгүс нэһилиэгэ ууга былдьаммыта. Дойду таһымнаах ыксаллаах быһыы-майгы режима биллэриллибитэ. Хатырык нэһилиэгин уу 100 бырыһыан ылбыта.

Бу алтынньы ыйдааҕы устуу. Галина Суздалова дьиэтэ өһүөтүгэр диэри ууга барбытын кэпсиир. Онон биир кыл түгэнигэр кини ытыс соттон хаалбыт.  Уу ньаалгылаабыт истиэнэтин сууйар-сотор. Кыстыгы бэлэмэ суох көрсөрүттэн хараастар.

Галина Суздалова, Хатырык олохтооҕо: «Барыта баран, алдьанан, барытын бырахтыбыт. 100 тыһ. ылбыппытынан муостабытын бетонунан куттубут. Бэйэм кыахпынан сууйа оҥорбута буола сылдьабын. Номнуо кыстык буолла ол быыһыгар сүөһүлэрдээхпин».

Халааҥҥа эмсэҕэлээбиттэргэ уопсайа 2 миллиард солкуобай кээмэйдээх көмө көрүлүннэ. Мантан  900 мөлүйүөнтэн тахсата федеральнай итиэннэ миллиардтан тахсата өрөспүүбүлүкэ хааһынатыттан бэрилиннэ. Оттон быйыл саас өрүс эстиитигэр бэлэмнэнии  сүрүн үлэтэ, ол эбэтэр  хараардыы уонна эрбээһин кэлэр ыйтан саҕаланыа. Маныаха быйыл хаһааҥҥытааҕар да элбэх үбүлээһин көрүлүннэ.

Петр Аргунов, Өлүөнэтээҕи уу салалтатын салайааччы: «Өлүөнэҕэ, Халымаҕа 38 мөл. көрүлүннэ быйыл. Оттон Алдаҥҥа, Аммаҕа, Ньүүйэҕэ, Токкоҕо 17 мөл. Уопсайа Саха сиригэр быйыл халаан уута этэҥҥэ аастын диэн 54 мөл. курдугу көрөн олоробут».

Маны тэҥэ өрөспүүбүлүкэҕэ баһаартан сэрэхтээх буолуу кэмигэр бэлэмнэнии эмиэ тэҥинэн барар. Манна сүрүннээн баһаарынайдары, быһааччылары  үөрэтиигэ болҕомто ууруллар.

Николай Копырин, "Авиалесоохрана" Дьокуускайдааҕы салаатын аҕа лүөччүгэ: «Сабаҕалааһынынан көрдөххө биһи оройуоммутугар бэс ыйыгар кыракый умайыылар баар курдуктар».

Оттон быйыл хаар саппааһа Бүлүү бөлөххө, Кэбээйигэ элбэх диэн бэлиэтэнэр. Оттон Индигир, Анаабыр уонна өлөөн өрүстэрин сүнньүнэн сөҥүү олох кыра. Бу баһаарга да халааҥҥа да охсуулаах көстүү буолуон сөп. Онон бэлэмнэнии үлэтэ хаалбыт күннэри баттаһа күүстээхтик барыа.