Дьокуускайга "Стройиндустрия Севера " диэн быыстапка үлэтин саҕалаата

Куруһаала атыы-эргиэн дьиэтигэр өрөспүүбүлүкэ уонна Арассыыйа бөдөҥ куораттарыттан тутуу, энергетика комплексын хампаанньалара бэйэлэрэ оҥорор бородууксуйаларын, тутуу саҥа матырыйаалларын, инженернэй чинчийиилэри билиһиннэрэллэр. Быйылгы быыстапкаҕа 35 кыттааччы баар. Тэрээһин 22 сылын бырабыытылыстыба, тустаах министиэристибэлэр, атыы-эргиэн палататын көҕүлээһинэринэн ыытыллар.

Андрей Шевелёв, тутуу матырыйаалларынан дьарыктанар хампаанньа үлэһитэ: «Биһи хампаанньабыт тутуу матырыйаалларын атыылыыр. Арматураттан саҕалаан саморезтарга дылы».

Бүгүҥҥү күҥҥэ Саха сиригэр тутар хампаанньалар ахсааннара элбиир, ону тэҥэ олорорго тупсаҕай, табыгастаах дьиэни тутууга саҥа сүүрээннэри киллэрэргэ дьулуһаллар. Мас чааһынай дьиэлэри тутууга бөдөҥ тэрилтэртэн биирдэстэрэ маннык капсульнай дьиэлэри таҥыыны саҕалаан эрэр. Ол курдук кыһынын да, сайынын сынньанар маннык дьоҕус дьиэлэри туризм эйгэтигэр биитэр арендаҕа анаан туттуохха сөп.

Марина Данилова, тутар хампаанньаны төрүттээччи: «Маннык дьиэлэр 28 кыбадырааттан 30-38 дылы оҥоһулаллар. 3 араҥалаах түннүктээхтэр. Умный дом ситимнээх. Миэбэлинэн хааччыллыылаах буолар».

Бу хайысхаҕа интэриэстээх дьон кэлэн саҥа технологиялары көннөрү билсиэхтэрин, биитэр бииргэ үлэлэһэргэ сибээс олохтуохтарын сөп. Хаҥалас улууһун Покровскай куоратыттан кэлэ сылдьар Анатолий Егоров уруккута тутуу эйгэтин үлэһитэ. Быыстапка буоларын истэн тута кэлэн билсэргэ соруммут.

Анатолий Егоров, Хаҥалас улууһун олохтооҕо: «Хабаровскайга оҥоһуллар оҕо былаһаккалара бааллар. Аныгы матырыйаалтан саҥа технологиялары туттан оҥороллор».

Бөдөҥ тэрилтэлэри, хампаанньалары тэҥэ быыстапкаҕа үөрэх кыһаларын бэрэстэбиитэллэрэ эмиэ бааллар. Дьокуускайдааҕы коммунальнай-тутар техникум бу эйгэ исписэлиистэрин бэлэмниир. 

Тихон Борисов, Дьокуускайдааҕы коммунальнай-тутар техникум оҥорон таһаарыыга үөрэтии маастара: «Биһиэхэ 600 студент оҕо үөрэнэр. Биһи сварка, сантехника, гипс уонна маляр хайысхаларга үөрэтэбит».

3 күн устата манна араас сонуну, саҥаны билсэри таһынан, дьылабыай бырагырааманан тутуу, энергетика, коммунальнай хаһаайыстыба салаалара кыттыылаах семинардар, төгүрүк остуоллар буолуохтара.