С гепатит олохсуйбут вируһун утары нэдиэлэ ыытыллар

Аан дойду үрдүнэн вируснай гепатит биир саамай тэнийбит уонна кутталлаах инфекционнай ыарыынан биллэр. Гепатит биэс сүрүн көрүҥэ баар, А, В, С,Д уонна Е.

В уонна С гепатит хроническай ыарыы быһыытынан сайдаллар уонна быар рагын, цирроһун сүрүн төрүөтүнэн буолаллар.Өрөспүүбүлүкэ үрдүнэн 14 тыһыынчаттан тахса киһи учуокка турар.  Ыарыһахтары саастарынан ыллахха, 30-50 тиийэ саастаахтар. Дьокуускайга клиническай балыыһаҕа бу салаа 1989 сыллаахха вируснай гепатит саамай тэнийэ сылдьыбыт кэмнэригэр аһыллыбыта.

Людмила Терёшкина, СӨ клиническэй балыыһатын инфекционнай салаатын старшай медсиэстэрэтэ: "14 палатаҕа 50 куойкалаахпыт, маны таһынан ЗИ, ФГДС кабинеттара бааллар. Онон ыарыһах биир сиргэ чинчийиини ааһар кыахтаах. Уопсайа 32 исписэлиис үлэлиир, ол иһигэр 6 быраастаахпыт, 14 сиэстэрэлээхпит".

Гепатит диэн араас төрүөтүнэн быар сүһүрэр ыарыыта. С гепатит уратытынан кини ханнык да сибикитэ суоҕа биллэр, ол ыарыыны кэмигэр булууну уустугурдар. Билигин С гепатиты атын содулга тиэрдибэккэ эрэ үтүөрдэр уонна вируһу утары охсуһар саҥа туһалаах препаратттар баар буоллулар.  Бэлиэтээн эттэххэ, бу ыарыы икки хайысханан тарҕанар: сүрүннээн хаан нөҥүө бэриллэр. Сыллата салааҕа 600-700-чэкэ киһи дьарҕаа буолбут гепатиттаах киһи эмтэнэр.

Надежда Тихонова, СӨ клиническэй балыыһатын инфекционнай салаатын сэбиэдиссэйэ: "Бу кэнники сылларга гепатит С үчүгэйдик эмтэнэр. Аан дойдуга бу ыарахан ыарыыны эмтиир эмтэр баар буоллулар. Онон түмүгэ олох үчүгэй, 99% эмтэммит дьон ыарыыттан босхолоннулар".

Оттон дьиҥэр вируснай гепатитынан сааһыттан тутулуга суох ким баҕарар ыалдьыан сөп.  Онуоха эмчиттэр, чуолаан ыччакка өйдөтүү, сэрэтии үлэтэ көхтөөхтүк тэриллиэн наада диэн сүбэлииллэр. С гепатит утары быһыы суох эрээри, чинчийиилэр бараллар. Ханнык баҕарар ыарыыны эрдэттэн сэрэппит ордук. Онон доруобуйаны көрүнэ сылдьар хайаан да наада.