Роман Дмитриев турнирыгар

Чулуу спортсмен, Саха сириттэн бастакы олимпийскэй чөмпүйүөн Роман Дмитриев аатынан көҥүл тустууга турнир сылын аайы ыытыллар. Быйыл күрэххэ 200-тэн тахса бастыҥ эдэр спортсмен күөн көрүстэ.  Ол иһигэр Саха сириттэн 90 бөҕөс кыттынна.

Василий Неустроев, юниордарга көҥүл тустууга Саха сирин сүүмэрдэммит хамаандатын тренерэ: «Бу турнирга кыттар саастаах элбэх оҕо тустар. Сылын аайы 50-60 спортсмен буоллаҕына, быйыл 90 оҕо кыттынна. Бу элбэх оҕо тустуунан дьарыктанарын көрдөрөр. Аҕыс атын омук дойдутуттан уонна дойду тоҕус регионуттан кэллилэр. Олус күүстээх тустууктар кэлбиттэр. Биһиэхэ 97 киилэҕэ Аронов Женя диэн уолбут олус үчүгэйдик тустан 1 миэстэ буолла».

Хаҥалас улууһуттан сылдьар Дьулус Петров тустуунан дьарыктаммыта тохсус сыла буолла. Роман Дмитриев аатынан күрэххэ сылын аайы кыттар. Быйылгы ыытыллыбыт турнирга бэйэтин ыйааһыныгар 3 миэстэ буолла.

Дьулус Петров, СӨ олимпийскэй эрэллэри бэлэмниир училищетын иитиллээччитэ: «Монгуол уолун итини сэргэ Красноярскай тустуугун кытта киирсибитим. Атыттара саха уолаттара этэ. 3 миэстэ буоллум, өссө үчүгэйдик тустуохха сөп этэ».

Роман Дмитриев аатынан көҥүл тустуу турнирыгар күрэхтэһии эдэр спортсмеҥҥа улахан ситиһии буолар. Сылын аайы бу күрэххэ кыттыан баҕалаах спортсмен элбээн иһэр. Быйыл эмиэ турнир Аан дойдуттан тиийэ бастыҥ спортсменнары биир сиргэ түмтэ.

Леонид Спиридонов, СӨ спорт миниистирэ: «Бу күрэхтэһииттэн үгүс инникилээх спортсменнар тахсыбыттара. Ол курдук Лев Павлов манна эмиэ элбэхтэ кыттыбыта. Бу турнир тустууктар дас дойду спортсменнарын кытта бэйэлэрин тургутан көрөллөрүгэр уонна Арассыыйа күрэҕэр бэлэмнэнэллэригэр улахан төһүү буолар».

Бу турнир кэнниттэн спортсменнар дойду таһымнаах күрэххэ өрөспүүбүлүкэ чиэһин көмүскүү барыахтара.