Федор Попов үрдүк аатын өрө тутан

Дьокуускай 20 №-дээх оскуолатыгар хас биирдии үөрэнээччи Федор Кузьмич Попов туһунан, кини кимин эҥкилэ суох билэр. Тустаах үөрэх кыһата 2001 сыллаахтан саха бастакы дьоруойун аатын сүгэр. Оскуолаҕа киирдин да кини мэтириэтэ көрсөр.  11 кылаас үөрэнээччитэ   Денис Федоров  үөрэнэр оскуолата дьоруой аатын сүгэринэн киэн туттар. Кини Федор Кузьмичы үтүө холобур оҥостор, хорсун быһыытын үрдүктүк сыаналыыр.

Денис Фёдоров, Дьокуускайдааҕы 20-с №-дээх оскуола 11 кылааһын үөрэнээччитэ: “Кини туһунан “Мин киэн туттар киһим” диэн хоһоон айбытым. Онтон быһа тардан ааҕыам “... Саха сирин чулуу уола, Саха сирин киэн туттуута, Саха сирин күүстээх санаата – Сүөдэрбит, дьоруойбут...”.

Сахалартан бастакынан Сэбиэскэй Сойуус Дьоруойун аатын сүкпүт Федор Кузьмич Попов 1921 сыллаахха Мэҥэ Хаҥаласка иккис Баатара нэһилиэгэр күн сирин көрбүтэ. Кини фроҥҥа 1943 сыл иккис аҥаарыгар тиийэр. Онно 81-с стрелковай дивизияҕа автоматчигынан сылдьар. Хас да самнарыылаах кимэн киириилэр кэннилэриттэн өстөөх Днепр уҥуор быраҕыллыбыта. 81-с дивизия Любеч сэлиэнньэтигэр хорсун быһыыны көрдөрөр. Федор Попов 1943 сыл алтынньы 10 күнүгэр охсуһуу толоонугар Гомельскай уобалаһыгар дьоруойдуу охтор. 1944 сыл тохсунньу 15 күнүгэр ССРС үрдүкү сэбиэтин президиумун ыйааҕынан Федор Поповка Сэбиэскэй сойуус дьоруойун аата иҥэриллибитэ. 

Андрей Новоприезжий, Дьокуускайдааҕы 20-с №-дээх оскуола дириэктэрэ: “1973 сыллаахха ленинскэй дружина  Федор Попов аатын эҥэриммитэ. Ол кэннэ Баатара нэһилиэгэ оскуолаҕа Ф.Попов бюстун бэлэхтээбитэ. Ол билигин да оскуолабыт иннигэр турар. Кини биһиги үөрэнээччилэрбитигэр күүстээх, хорсун санаа бэлиэтэ ”.

Манна даҕатан эттэххэ, бу сылга киин куоракка Федор Поповка пааматынньык туруоруллуохтаах. Ол курдук, Ил Дархан Улуу Кыайыы уонна Федор Кузьмичка Сэбиэскэй Сойуус Дьоруойа аат иҥэриллибитэ 80 сылынан ааспыт сылга пааматынньык туруоралларын уонна дьоруой аатынан искибиэри оҥорор туһунан соруйбута. Онон сахалартан бастакы дьоруой аатын үйэтитии салҕанан барар.