Таатта улууһун киинигэр "Сарыал" култуура киинэ кэлэр тэрээһиннэргэ бэлэмнэнэр

Үҥкүүһут идэлээх Елена Колесова иистэнэр массыынканан туох да эҥкилэ суох үлэлиир. Оттон кини бүтүн улуус тэрийбит олбох аахсыйатыгар кыттыыны ыла сылдьар. Билигин кини бииргэ үлэлиир кыргыттарын кытары ииһин ортолоппут.

Елена Колесова, "Сарыал" култуура уонна маассабай спорт киинин үлэһитэ: «Улуу Кыайыы 80 сылыгар аналлаах аахсыйаҕа олбох тигэ сылдьабыт. Уопсайа 800 тигиллиэхтээх. Тэрилтэлэр бары кытталлар. Бу ый бүтүүтэ туттарыахтаахпыт».

Оттон бу иистэнии барыта Таатта улууһун биир тарбаахха баттанар култуура уонна маассабай спорду дьоҥҥо тарҕатар Сарыал киин иһинэн бара турар. Тэрилтэ үлэһиттэригэр манна өссө күүс-көмө нэһилиэк аҕам саастаах дьоно ылаллар.

Мария Бондарева, Таатта нэһилиэгин бэтэрээннэрин сэбиэтин бэрэссэдээтэлэ: «Нэһилиэкпит аҕам саастаахтара тигэ сылдьаллар уонна Сарыал култуура киинин үлэһиттэрэ. Ол 800-тэн 200-һэ биһиэнэ буолуохтаах».

Сарыал култуура киинэ 2008 сыллаахха Гражданскай килбиэн бэлиэ хаһаайката Галина Макеева көҕүлээһининэн тэриллибитэ. Кини кэниттэн 15 сылын култуура туйгуна Алексей Тарасов Сарыалы салайар. Тэрилтэ күн бүгүн 30 үлэһиттээх, Ытык Күөлгэ култуураны уонна спорду биир тэҥник тутан үлэлии-хамсыы олорор.

Тыа сирин кээмэйинэн үгүс элбэх түмсүүлээх киин билигин ситиһиитэ баһаам. Бу бэрт соторутааҕыта Сомоҕолоһуу күүһэ өрөспүүбүлүкэтээҕи күрэххэ Сарыаллар анал аат хаһаайына буолан кэллилэр.

Матрёна Сунхалырова, "Сарыал" култуура уонна маассабай спорт киинин салайааччытын солбуйааччы: «Бүтүн Арассыыйатааҕы аахсыйа чэрчитинэн өрөспүүбүлүкэтээҕи хор кэлэктииптэрин көрөр күрэскэ биһиги аҕам саастаахтарбыт хордара баран кыттаннар “Честь и доблесть” диэн улахан номинацияны ылан кэллилэр. Оттон салайааччы – СӨ култууратын үтүөлээх үлэһитэ Карл Иванович Христофоров “Лучший концертмейстер года” диэн номинацияны ылла».

"Сарыал" култуура киинэ билигин Кыайыы 80 сылыгар уонна буолаары турар Манчаары оонньууларыгар ох курдук оҥостон бэлэмнэнэр.