Саас кэлэн ырыынакка атыы-тутуу тэтимирдэ

Сайсары бааһынай ырыынагар дьон сылдьыыта, кэлии-барыы соччо көҕө суох эрээри, атыы кыралаан барар. Оттон ырыынакка тута киирээт да көрдөххө ас-үөл дэлэй, прилавоктар хотойорунан эгэлгэ балыгынан, отонунан кыстанан тураллар. Ырыынакка ким үрүҥ ас, ким хортуоппуй, ким эт-балык ыла кэлэр.

Марфа Григорьева, Дьокуускай олохтооҕо: «Үүт аһын ылабын уонна биирдэ эмит балык. Хортуопуй быйыл сыаналаммыт, ол да буоллар онто суох хайдах олоруохпутуй».

Саханы саха гыммыт собону улаханыттан көрөн киилэтин 250-450 солкуобайга диэри атыылаһыахха сөп.  Күндүөбэйи эмиэ итиччэ сыанаҕа турар. Быранаатта киилэтэ биэс мөһөөх. Чыыр балык олох кырата 1000 саҕалаан сыанаҕа  турар. Дьокуускай олохтооҕо Юрий Ксенофонтов балык амсайаары анаан-минээн кэлбит.

Юрий Ксенофонтов, Дьокуускай олохтооҕо: «Балык арааһа, сыаната уруккутун курдук».

Эт сыаната кыһыҥҥыттан улаханнык уларыйбакка турар. Ынах этин киилэтин 800 солкуобайтан, убаһаны 1000 саҕалаан сыанаҕа атыылаһыахха сөп. Сибиинньэ этин 500, таба этин 600 саҕалаан сууммаҕа турар. Мас көтөрүн, куобаҕы амсайыан баҕалаах кыратын улаханын талыан сөп. Куобах сыаната 2 тыһыынча.

Владимир Стручков, Тулагы олохтооҕо: «Сыана ыарахан, күн аайы ыарыы турар. Ас-үөл элбэх, ол гынан баран харчылаах буолуохха наада».

Таһырдьа тоҥ эт, балык ас түргэнник салгылыырынан сорох атыыһыттар сыананы кыралаан да буоллар түһэрэллэр эбит.

Канашай Мамажанова, балык атыыһыта: «Чиры продавали по 1200, сейчас продаем по 900. Покупатель может и поторговаться».

Отон киилэтэ 600, сугун киилэтэ 1000 турар. Сааскы киһи салбаммытынан. Сотору өссө сылыйан ууллардаҕына, таһырдьа тоҥ ас атыыта тохтуура күүтүллэр.