Дьокуускайга национальнай многоборьеҕа өрөспүүбүлүкэ чемпионата ыытыллар

Саха төрүт көрүҥнэрин баһылаабыт 60 тахса бастыҥ спортсмен Манчаары оонньууларыгар кыттар иһин киирсэр. Национальнай многоборье биир тыҥааһыннаах, өрө күүрүүлээх көрүҥэ мас тардыһыы. Манна кэрэ аҥардар киирсиилэрэ эр дьонтон хаалсыбат. Нарын-намчы кыргыттар эт-сиин өттүнэн күүстэрэ бу манна көстөр.

Сунтаартан сылдьар Мичийэ Большакова национальнай многоборьеҕа кыргыттарга биир бастыҥ. Кини Горнай улууһугар буолбут Манчаары оонньууларын кыайыылааҕа. Бу сүүмэрдиир түһүмэххэ эмиэ инники иһэр. Оттон Мичийэ өрөспүүбүлүкэҕэ эмиэ биллэр спортсмен, Дыгын оонньууларын кыттыылааҕын Тимофей Большаков кэргэнэ буолар. Бу күрэххэ иккиэн кытта сылдьаллар, онон бэйэ-бэйэҕэ өйөбүл, көмө буолаллар.

Мичийэ Большакова, күрэх кыттыылааҕа: «Билигин Санкт-Петербурга үөрэнэ сылдьабын уонна онно дьарыктанабын. Былааммын кэргэним ыытар. Бары эбиллибиттэр».

Национальнай многоборье сүүмэрдиир күрэҕэр барыта 24 хамаанда кыттар. Үгүс улуустан спортсменнар бэйэ кыаҕын холоноллор. Ньурба улууһуттан икки эр киһи уонна биир кэрэ куо күрэхтэһэ сылдьаллар. Кинилэр истэригэр өрөспүүбүлүкэҕэ биллэр спортсмен, Дыгын оонньууларын кыттыылааҕа Николай Обоев баар. Оттон быйылгы Манчаары оонньууларыгар Ньурбалар  уопсайа 10 көрүҥҥэ кыттарга бэлэмнэнэллэр.

Роберт Алексеев, Ньурба улууһун спорт салалтатын салайааччыта: «Тааттаҕа улахан дьоммут уонна оҕолорбут күрэхтэһэ бардылар. Бу иннинэ мас тардыһыытыгар хомойуох иһин 6 путевка ылбыппыт».

Манчаары оонньууларыгар сүүмэрдиир түһүмэхтэр билигин тиһиги быспакка ыытыллаллар. Ол курдук, хабылык хаамыска оонньуутугар номнуо кыттааччылар быһаарылыннылар. Маны тэҥэ мас тардыһыытыгар, уонна бу национальнай многоборьеҕа сотору кэминэн бары путевка хаһаайына биллиэҕэ.

Геннадий Васильев, Манчаары Баһылай аатынан саха төрүт көрүҥнэрин сайыннарар спорт киинин дириэктэрэ: «Хотугу многоборье Таатта улууһугар ыытыллыаҕа, ону таһынан гиирэ күрэҕэ эмиэ Таатта улууһугар ыытыллыаҕа. Өрөгөй уораҕайыгар хапсаҕайга чемпионат ыытыллыа, оҕунан ытыы, сүүрүү уонна атах ыстаныыта».

Онон бу ый бүтүөр диэри сүүмэрдиир түһүмэх улахан аҥаара барыта түмүктэниэ. Кимнээх кытталлара чопчу биллиэҕэ. Оттон быйылгы Манчаары оонньуулара Таатта улууһугар от ый саҥата ыытыллыаҕа.