Манчаары оонньууларыгар Таатта улууһугар бэлэмнэнии бара турар

Ытык Күөл өрөспүүбүлүкэ таһымнаах тэрээһини ыытарга бэлэмнэнэр. Билигин сүрүн күүс спортивнай эбийиэктэри дьэндэтиигэ ууруллар.  Алексей Турнин аатын сүгэр спорт дыбарыаһа билигин сиэрин силигин ситэн эрэр.  Манна номнуо уота-күөһэ, ититэр ситимэ киирэн, эбийиэк иһигэр ис үлэтэ ньиргиччи бара турар. Спорт дыбарыаһа олус улахан - 8800 кыбадыраатынай иэннээх.

Пётр Захаров, "Манчаары оонньуулара" спартакиаданы тэрийэр дирекция салайааччыта: «Саамай улахан саалбытыгар 200 миэтэрэлээх сүүрэр суол тэлгэниэхтээх, ортотугар футбол, баскетбол түһүлгэлэрэ баар буолуохтара».

Бу дыбарыаһы кытары Ньургун Боотур аатын сүгэр 1000 киһи биирдэ батан олорор стадиона тутуллан түмүктэнэр түһүмэҕэр кэлбит, маныаха Чөркөөххө спорт киинэ уонна Дьохсоҕон нэһилиэгэр  аһаҕас халлаан анныгар кыра стадион туттуллан үлэҕэ киириэхтэрэ.

Быйылгы оонньууларга анаан өрөгөй ырыата сурулунна. Улахан куонкурус түмүгүнэн Тааттаттан сыдьааннаах ааптардар айымньылара кыайары ситистэ. Билигин гимны ситэрэн-хоторон биэрэ сылдьаллар. Уопсайынан култуурнай бырагыраамаҕа 2000-тан тахса киһи кыттара былааннаннар. Арыллыы сиэрэ -туома үгэс быһыытынан оонньуулар бастакы күннэригэр ыытыллыаҕа

Гаврил Вырдылин, "Таатта улууһа" МТ култуура салалтатын салайааччыта: «Улуу Кыайыы 80 сыла уонна Борис Федорович Неустроев – Мандар ууспут 80 сааһа. Ол иһин итини ситимнээмит, хатыламмат аһыллыы буолан эрэр. Режиссерунан – дебютант, Олонхо тыйаатырын режиссера, Саха тыйаатырын уонна киинэ артыыһа – Роман Романович Дорофеев буолла».

Маны кытары тэҥҥэ нэһилиэк тас бараана тупсарыллар. Арыый сылыйдаҕына Өксөкүлээх Өлөксөй пааркатыттан стадиоҥҥа диэри хаамар сир тутуллуоҕа, маныаха билигин улахан муоста тутуллуута бара турар. Манна даҕатан эттэххэ, Таатталар 7000 кыттааччыны уонна 30 тыһ. ыалдьыты көһүтэллэр. Онон билигин волонтердар халыҥ хамаандаларын хомуйуу саҕаланна.

Варвара Рахлеева, "Таатта улууһа" МТ ыччат уонна дьиэ кэргэн политикатын салалтатын салайааччыта: «Быйыл 200 волонтеры хамсатыахтаахпыт. Билиҥҥи туругунан Добро.рф сайтка сайаапка хомуйа олоробут».

Санатабыт, 22 төгүлүн ыыттыллар Манчаары оонньуулара быйыл от ыйын  7-12 ыйын күннэригэр ытык Таатта сиригэр быыппастыгас быччыҥнаах, дьондоллубут сотолоох өрөспүүбүлүкэ бастыҥ спортсменнарын биир сииргэ түмүөҕэ. Уопсайа 11 спорт национальнай көрүҥнэригэр спортсменнар илин-кэлин түсүһүөхтэрэ.