Саас кэлэн күөх үүнээйилэри олордуу түбүгэ үүннэ

Национальнай библиотекаҕа номнуо 3 күнүн тропическай күөх үүнээйини сөбүлээччилэргэ анаан быыстапка-дьаарбаҥка тэриллэр. Хотугулуу-Илиҥҥи федеральнай университет ботаническай саада сыллата кулун тутар 8 күнүн көрсө сибэкки бэстибээлин тэрийэр. Манна бу сырыыга дьэрэкээн орхидея араас суорда, ону тэҥэ ураты сибэккилээх үүнээйилэр дьон болҕомтотун тардаллар.

Людмила Кралина, ХИФУ ботаническай саадын агронома: «Тропическай үүнээйилэргэ сиик наада, күн уотуттан тэйиччи туруон наада, көрө сылдьыахха наада».

Бэстибээли барыта 150 араас ааттаах үүнээйи киэргэтэр.  Ураты чаҕылхай өҥнөөх кэрэ сибэккилэр тустаах иһиттэргэ дьиэлэммиттэр. Маны тэҥэ тэрээһиҥҥэ ботаническай саад бэйэтэ үүнэрэн таһаарбыт өр сыллаах талах мастар, декоративнай үүнээйилэр сиэмэлэрин атыылаһар кыах баар.

Елена Гусякова, ХИФУ ботаническай саадын сотруднига: «Также у нас проходит ярмарка растений произрастающих в ботаническом саду, травянистые и древесные».

Кэрэ үүнээйи тэрээһинигэр маны тэҥэ сибэкки хаарытскаларын быыстапкатын уонна араас үөрэхтэргэ сылдьан сибэкки үүнэр кистэлэҥин кытта билисэххэ сөп.

Саина Шапошникова, ХИФУ ботаническай саадын сотруднига: «Күн аайы араас маастар-кылаастар, кэпсэтиилэр буолаллар. Биһи айылҕабыт матырыйаалыттан оҥоһуу оҥороллор, үүнээйи олордоллор».

Билигин сибэкки үүннэрээччилэргэ, оҕуруот аһын олордооччуларга түбүктээх кэм. Ол курдук сиэмэ талыыта, атыылаһыыта киин болҕомтоҕо сылдьар. Маннык туһааннаах маҕаһыыннарга киһи кэлиитэ элбиир.

Анджела Николаева, маҕаһыын старшай атыыһыта: «Пиэрэстэри ылаллар уонна сибэккилэри атыылаһаллар».

Оҕуруот олордуута биллэн турар күүһү-уоҕу, сыраны, бүөбэйдээһини эрэйэр. Ону тэҥэ, үп-харчы эмиэ аҕыйаҕа суох барар. Аҥардас сиэмэ, буор, уоҕурдуу, битэмиин, тэрил, иһит-хомуос, фитолампа ыларга ботуччу суумманы хаалларан тахсаҕын, быйыл ааспыт сыллааҕар сыана эмиэ үрдээн турар.

Сиэмэни талыы эмиэ туспа ымпыктардаах, хаачыстыбалаах эрэ сиэмэ учугэйдик силигилээн тахсар. Уопуттаах оҕуруоччуттар сиэмэ түргэнник үүнэригэр көҕүлүүр араас ньымалары туһаналлар уонна бэрэбиэркэлэммит сиртэн атыылаһаллар.