Кубулҕаттаах кулун тутар тоһуттар тымныылартан саҕаланна

Саха сиригэр сааскы ый бастакы күннэригэр үгүс оскуолаҕа актированнай күннэр биллэрилиннилэр. Ураты көстүү хоту эрэ улуустрга буолбакка Бүлүү бөлөххө эмиэ бэлиэтэннэ. Ол курдук, Үөһээ Бүлүүгэ, Ньурбаҕа кэккэ нэһилиэктэргэ оҕолорго оскуолаҕа үөрэх тохтотулунна.

Сергей Васильев, Ньурба улууһун үөрэх салалтатын салайааччытын солбуйааччы: «Ньурба оройуонугар билиҥҥи туругунан халлаан тымныытынан сибээстээн 13 нэһилиэк оскуолаларыгар уонна Ньурба куорат оскуолаларыгар актированнай күннэр бэриллибиттэрэ. Ол курдук бастакыттан бэһис кылааска дылы дьиэлэриттэн үөрэнэллэр».

Быйылгы кыһын ураты сылааһынан биллибитэ, онон билигин кэлэн халлаан тымныйан эрэр. Ол эрэн бу сэдэх көстүү буолбатах, кулун тутар Саха сиригэр син биир кыһыҥҥы ыйынан биллэр онон тымныы буолар диэн күнү-дьылы кэтээн көрөөччүлэр этэллэр.

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаа салайааччыта: «Кулун тутар бастакы күннэригэр атмосфернай давление үрдээн Арктика тымныы салгына киирэн өрөспүүбүлүкэ үрдүнэн кыүыммыт төнүннэ. Түүҥҥү температура хотугулуу-арҕаа уонна хотугулуу-илин оройуоннарга -48,-53 кыраадыска дылы тымныйда. Онтон арҕаа уонна киин оройуоннарга -40,-47 кыраадыска дылы. Тымныы күн-дьыл бу нэдилэҕэ дылы туруоҕа».

Ордук тымныы күннэр хоту, хотугулуу арҕаа улуустарга бэлиэтэнэллэр. Ол эрэн, киин эҥэр түүҥҥү бириэмэҕэ эмиэ 40 кыраадыска тиийэ тымныйыаҕа. Маныаха  билигин Россия бары регионнарыгар тымныы салгыннаах.

Оттон өрөбүллэртэн саҕалаан киин эҥэр сылыйыа. Хаардаах-тыаллаах сааскы күннэр салҕаныахтара. Онон киин куоракка олох-дьаһах коммунальнай хаһаайыстыба, суол үлэһиттэригэр түбүктээх күннэр тураллар. Күннэтэ уулуссалары хаар билиэниттэн босхолууллар.

Владимир Чемезов, Октябрьскай уокурук муниципальнай дворнига: «Биһи элбэхпит, сорохтор атын эбийиэктэргэ сылдьаллар. Тыраахтар киирбэт сиригэр илиибитинэн ыраастыыбыт».

Онон билигин бары уокуруктарга хаары хомуйуу үлэтэ ыытыллар. Уулуссалартан эрэ буолбакка тэрилтэлэргэ кырыыһалартан эмиэ түһэрэн саҕалаатылар. Оттон күнү-дьылы кэтээн көрөөччүлэр кэлэр нэдиэлэттэн сааскы халлаан туруо диэн сабаҕалыыллар.